كنت ابكي قبل شوي..

كنت ابكي قبل شوي..

خرجت قبل شوي كعادتي كل ويكند
اخرج الليل ( لوحدي لان ماعندي اصحاب ولا معارف اصلا )

والفلف بسيارتي واتمشى في التحلية بجدة
والكل في السعودية يعرف هذا الشارع مشهور
وشارع اخر اسبوع للشباب والعوائل وكعادتي اروح ( لوحدي )
وانغبن كل مره اروح يمين ويسار شباب مع بعض او بنات مع بعض
واهالي مترابطين خارجين مع بعض الا انا ربي هذا اللي كتبه لي..

وكنت ماشي في شارع طويل وفاضي وماشي بسرعه عاليه
وشي طبيعي ومتعود عليه يعني والشارع هذا دايما فيه كذ

وماعرف متى حطو فيه ( مطب صناعي حاد جدا )
واخذته على سرعتي وانعدمت سيارتي ( خربت فوق خراباتها )
انغبنت ورجعت البيت لا فلوس تكفيني اصلح سيارتي الملعونه وخراباتها
لا ناس اخرج معاهم وانبسط ولا اصحاب .. لا اهل مترابطين
لا اب طبيعي زي اباء اصحابي ياخذ ويعطي معاي ونتكلم واشكي له
لا احد اشكلي له ماقدر افضفض لاحد ماقدر اتكلم وحاولت وفتحت قلبي ( لكن كلهم طفشو مني لان مشاكلي تجيب الهم)
خلاص كل شي فوق راسي مصايب بلاوي خرابات سياره فلوسي يلا تكفيني انا اللي ادلع نفسي واشتري لنفسي جوال وكل شي
ابوي مايسوي لي كذا يعني ابوي يشوف ان عليه 500 ريال فقط كل شهر وادبر نفسي وعينه على مكافئتي الجامعيه انها تكفيني
وياليته انسان ارتاح واعتبره يد يمين لي واجلس اكلمه واشكي له ولا اسولف معاه
لا من النوع اللي ضدي في كل شي وطول وقته وكلامه هزل واستهبال

جلست شويا بيني وبين نفسي بعد مارجعت البيت طفشان ومقهور ومتضايق ومغبون من كل شي حولي ومن كل اوضاعي الاجتماعيه والماديه
وحتى سيارة احلامي وعدني فيها سنتين ولمن جا وقت الشراء اشترالي سياره مستعمله ماتسوى 50 الف ريال سعودي ( دليل انه مو اب ينأخذ منه كلمه ولا وعد ولا كلام رجال ولا ليش يوعدني سنتين ويخلف ولا احد يقول ضروف والله ماعنده )

لاحظو كل شوي ارمي موضوع جديد لكن قلبي مليااااان مواجع رجعت البيت فاضي مافي الا انا
والله جلست شوي احس بقلبي زي الجبل وبكيت واشاهق من الضيق وانا طبعي مابكي
لكن حمدلله اليوم قدرت وارتحت انا دايما اقول ياليتني اقدر ابكي انا ماقدر دموعي ماتخرج
لكن حمدلله اليوم بكيت وارتحت شوي

خلاص صرت مابين مؤمن بالله ومابين شخص كاره نفسي وضايق وابغى النهايه
مو معقوله راجع البيت الاقي عن الاشارات غزل ومعاكسه وناس تذنب ومبسوطه
وانا اللي بكل شي كمان تتعوكس في وجهي وعلشان خرجت انبسط شوي لوحدي كمان
يجيني مصيبه سيارتي خربت يعني اش اسوي انا الحين والله ماقدر اصلح ولا اسوي شي

الله يعين يارب غير حالي من عندك ان اللي تقول للشي كن فيكون يااارب مليت غير حياتي بمعجزه من عندك ....

المصدر: نفساني

اخي الله سبحانه وتعالى حرم على نفسه الظلم

وهو سبحانه وتعالى مطلق القدرة .. ليس كمثله شيئ

1- الحكم العدل الذي لا يتوقع منه الظلم ولا ينبغي له.

2- القوي الشديد العظيم القدرة الشديد البطش.


باختصار ... وبوضوح أكبر ..

أي ظلم ينسب إلى الله تعالى فهو عظيم وإن قل ..

فإنه سبحانه وتعالى لا ينبغي له أن يظلم لا قليلاً ولا كثيراً. لأنه حرم الظلم على نفسه.
والله أعلم

أتمنى أن يكون المعنى واضحاً .

أجارك الله في مصيبتك أخي، البكاء يغسل الروح و يطهرها، أنا يوم أبكي أحس إن تأثير الآلام و الخيبات أقل بشوي، اللي صار قضاء و قدر فلا تزعل أكثر مما أنت زعلان مع الوقت إن شاء الله كل شي يتصلح و ترجع تحوط مثل أول و تسمع الموسيقى اللي تحبها. الوحدة حالة غريبة لظروف معينة الإنسان مجبور يعيشها، طبعا الإنسان يتمنى الأفضل يتمنى يكون عنده أصدقاء تجمعه فيهم صداقة و أخوة و يحس الوقت يروح معاهم و هو في سعادة و طمأنينة، سمر من سهم الفضاء تغني و تقول "ربما لحظة ود و حنان تحت سقف من وئام و أمان" فعلا هذي لحظة تغير الإنسان و ما يكون بينه و بين السعادة حاجز، إن شاء الله تعيش هذي اللحظة أخوي.

معليش يا اخوي مافيه انسان مرتاح بالدنيا
انا نفس حالك تقريبا لا عندي علاقات ولا اصدقاء
اطلع افرفر لحالي وارجع
عرضت نفسي على طبيب يقول معاك رهاب وجالس اتعالج بالادوية الان وان شاء الله تجيب نتيجة معي
الله ييسر امورك

انا مثلك سيارتي مكركبه ودايم جالس بالبيت ولا اطلع



أسأل نفسي وأتساءل ليه انا انخلقت وش الفايده من وجودي لكن مافيه اي جواب

معليش ما تزعل من كلامي وكون هادي بس بدي اقولك سيارة بخمسين الف ريال سعودي وتشوفها ما شاء الله رخيصه ربااه 😒 ورب الكون عندنا شباب بتاخذ لها سيارة 10 الف دين ومكسره عالاخر كمان 😂
ههه
وبعدين انت كنت مسرع الله يهديك فقول الحمدلله انك بخير وما تورطت بصدم احد الف الحمدلله ع سلامتك ، فكر بهدوووء ورب الكون انك احسن من غيرك ،
وربما الي تفتقده في اهلك عدم قربهم منك وانا بصراحه اقول مالهم حق في هالامر ، الله يهديهم لك و
اسال الله يغير حالك الى افضل حال ،
لكن بدي اقولك شغله كمان تذكرها مني جيداً كل مر راح يمر ، ثق بالله
كل فتره وتعدي وتلقى نفسك بخير ووضعك احسن حال آمين يارب..ما تزعل اعتبرني اختك الكبيره

الله يرزقك يادجا القمر

المشاركة الأصلية كتبت بواسطة الفدعوسي

الله يرزقك يادجا القمر

تسلم اخي واياك يارب يالطيب
لكن ليش ههه ؟

قول الحمدلله غيرك تلقاه عايش بحي مثل امبابة في مصر ومعاه نفس مرضك تعال رقعها يستخدم الكرتون مكان المروحه المكيف هذا ماعمره شافه والبعوض فوق راسه والحي كله يمر من جنب الشباك حتى بياع الملوخيه والطماطم والبطيخ وشوي تحضرلك جريمة قتل من الشباك زوجها راميهامن الدور الي فوقك واطفالها حولها يبكوا والعرق يصب من جبهتك على الجثه وبالليل تمر من عند الشباك فرقة ابو شعر الصوفية وبعدها فرقة ابو الليل والرقاصة عمرها 70سنة وشوي مداهمه للحي وياخذوك بالسيارة البوكس ظلم علشان الظابط يترقى ههههههههه تعال شوف الهند وبنقلاديش الي اكثر نسبة بالعالم عندهم مرض الاكتئاب كيف عايشين

ما أزيد على كلام الإخوان وفوا وكفوا
يبقى السؤال هل أنت فعلا لديك مرض الاكتئاب أو غيره ؟
أو طريقة تفكيرك وأسلوبك بالحياة هي أحدثت لك اكتئاب غير مرضي سببه الحياة التي عايشها

السلام عليكم ورحمة الله وبركاته


أخي العزيز ... السؤال هو هل تريد التغيير في حياتك ؟


ممتاز ... التغيير يبدأ من نفسك .. أما تنتظر تغيير كل العالم من حولك وبدون أي تغيير منك فهذي إغسل إيدك ببنزين وفلاش

لابد أول شيء يكون عندك نظرة واقعية وتقدير متوازن للأمور اللي لك واللي عليك


إبدأ بنفسك أولا من الناحية الدينية .. كيف ترى نفسك ؟
ومن ثم من الناحية الإجتماعية .. وكونك طالب جامعي من المستحيل إنه ما توجد فرص لتكوين صداقات ... غير إنك ذكرت في معرض كلامك عن أبوك إنه مو مثل آباء أصحابك ..!!


عندك أصحاب أو لأ ؟؟ أو إنه في الحقيقة عندك أصحاب ولكن مو معجبينك والأب مو معجبك والعائلة مو معجبتك والسيارة بخمسين ألف ريال مو معجبتك وال 500 ريال كل شهر من الوالد مو معجبك غير مكافئة الجامعة وآكل شارب نايم على حساب الوالد مو معجبك بعد


لابد تكون واقعي حتى يكون حكمك على الأمور حقيقي ... أما إستمرارك على الأفكار هذي بيتعبك ولا راح تتطور إلا للأسوء .. لأن الناس ماهم عايشين على مزاجك وتصورك


التغيير لابد يكون منك أنت ... أولاً الوالد مو مجبور يشتري لك سيارة بخمسين ألف ولا بالمصروف الشهري ... لأن واجبه عليك هو إنك تأكل وتنام وتتعلم لين تصير رجل تعتمد على نفسك ... ولابد إنك تثبت وجودك له وتكون ناضج فكرياً وتتعفف عن الإلحاح عليه ووصفه بأوصاف لا تليق أولاً كونه أبوك اللي لحم أكتافك من خيره وإلى اليوم ... وثانيا لأنه رجل متكرم عليك بسيارة بمبلغ وقدره ... غير إنه إلى الآن يرش عليك فلوس وإنت رجل بشارب ولحيه


كلامي هذا أنا متأكد إنك ترى إنه قاسي .... ولكن صدقني واقعي .. وهذا اللي المفروض إنك تحطه بين عيونك


إنت رجل عندك مشكلة ولابد إنك تكافح من أجل التغيير وأول الطريق هو إنك تتفهم إن المشكلة منك أنت شخصيا مو من الناس ولا من العائلة ولا من الأب ... بالعكس ظروفك ممتازة من الناحية المادية ومن ناحية القدرة على تكوين صداقات جديدة وكثيرة كونك طالب جامعي وتملك المال وتملك السيارة وتملك المنزل وتملك الوقت ... أما لومك للوالد وهو متكرم عليك وجحودك لأصدقائك مره تذكرهم ومره تنكر وجود أصدقاء ومن ثم لومك للمطب بتخريب سيارتك وانت تسوق بسرعة كبيرة فصدقني لا المطب دري عنك ولا الوالد دري عنك ولا أصدقائك اللي تنكر وجودهم دروا عنك .... أنت ما تتعب إلا نفسك في الأسلوب هذا


تذكّر .... مجرد ما تبدأ بتغيير نفسك ونظرتك للأشخاص من حولك راح يبدأ الكل بالتقرب منك ... أما الأسلوب المعيشي هذا والحكم على الأمور بهذي الطريقة طبيعي ينفر الناس منك ... كيف الوالد عينه على مكافئة الجامعة وهو يصرف لك 500 شهري وسيارة بخمسين ألف !!!؟ ... ممكن هو ينتظر الفرصة إنك تثبت وجودك ومن ثم يتكرم عليك مرة ثانية بهدايا أكبر .. مع انه المفروض انت حاليا تفكر كيف ترد الجميل للوالد وتكافئه .. لأنك مو طفل .. إنت رجل حاليا وانظر للغالبية من الشباب في مثل سنك وكيف انتاجيتهم في الحياة وطريقة تفكيرهم ووزنهم للأمور خصوصا تجاه العائلة


ما عندي زود ... لكن ركّز الله يوفقك على نفسك وعالج أفكارك واترك الناس