تجربتي المريرة (وانا عروس) وطريقة شفائي

تجربتي المريرة (وانا عروس) وطريقة شفائي

السلام عليكم ورحمة الله

اسال الله سبحانة وتعالى ان يشفى كل مريض ويجعل هذا المرض تكفيرا لسيئاتنا ...

اخواني واخواتي ممن اصابهم هذا المرض احب ان انقل اليكم قصتي للاستفادة حيث انني شفيت تماما ولله الحمد .. ولا اريد الا الدعاء والاجر..

اولا انا بنت خوافة بطبعي .. واكثر شي كان يخوفني الحرامي انزرع هذا الخوف من الصغر ومع مشاهدة الافلام صرت اخاف اكثر واكثر .. بعد مارجعت من شهر العسل سكنت انا وزوجي في شقتنا .. العمارة كانت جديدة مافيها الا انا وهو فقط والحي جديد ومظلم والعمال في كل مكان وكان قدام العمارة فيه جبل دايم مليان شباب.. المهم اهلي رفضوا اسكن قالوا خطر عليكم الاثنين لكن اصرينا نسكن لان زوجي ماخذ اجازة ماراح يتركني في الشقة لحالي عبال مايسكنون اهله في عمارتهم الجديدة يوم من الايام حصل مشادة كلامية اخر الليل وطلع زوجي من الشقة مدري وين راح .. نزلت ادور ماحصلت احد رجعت شقتي وناظرت مع الشباك والا اشوف سيارة غريبة وقفت قدام العمارة على طول دقيت على زوجي والجوال كان بيطفي قلت انت وينك قال انا بعيد واشوا رد علي كان زعلان واذا زعل مايرد بس ربي سبحانه سخره .. انا خلاااااص بديت انهار قلت اكيد شاف زوجي راح وجاء لان الجبل مليان فيمكن واحد كان يراقب او شي لان مافي الشارع عمارة الا عمارتنا الباقي ماخلصوا .. المهم قلت له الححححححق فيه سيارة غريبة عند العمارة و قعدت اركض في الشقة ادور الشاحن اقل من دقيقة الا وباب شقتي يتحرك واحد قاعد يحاول يفتحه بشويش من برا مافي مقبض يعني لازم مقتاح وكان الباب مو مقفل .. انا يوم سمعت الباب خلااااااااص انهبلت ماعاد ادري وش اسوي الصراخ مايسوي شي لان مافي امل احد يسمعني العمارة مافيها احد والعماير اللي جنبنا كلها تتعمر .. زوجي مدري كم يبغاله عشان يجي يمكن يلحق ويمكن لا بديت ارجف وقلبي يخفق مررررررررررره وصدري انكتم وحابسة الصياح يقال ماابغى الحرامي يدري اني دريت عنه .. وخايفة اقرب من الباب رحت قفلت باب الفاصل ودخلت غرفة الجلوس وقفلتها ودفيت الدولاب مدري من وين جتني القوة لان الدولاب ثقيل وحطيته عالباب المهم دقيت على عمي مدري وش قلت له اتذكر كنت في حالة يرثى لها المهم دق زوجي قال افتحي الباب .. حسيت اني ولدت من جديد ورحت فتحت الابواب يوم شفت زوجي طحت عالارض وطاح الجوال من يدي وانكسر على طول وقعدت اصييييييح وابكي بقووووووووة وارجف جلست ساعة كاملة وانا ابكي واشهق لدرجة حسيت عقلي بيطير وقمت اهدي نفسي بنفسي يقولي زوجي مافي احد خلاص اهدي وانا ماادري وش يقولي احس انه اللي كان عند الباب هرب وبيرجع .. المهم طلع عمي مأجر الشقة اللي قدامنا وانا مادريت وصاحي الشقة كان محشش ولخبط بين الابواب ..
بعدها مر كل شي بسلام وضحكنا بعد مادرينا عن المستاجر ومرت الايام ونسينا السالفة قعدت شهرين تقريبا .. فجاة صرت احس بدوار غريب وخوف شديد وكتمة بس دقايق وراح مااعطيتة اهميه لاني اخاف من الدوحه من زمان .. بعد كذا رحت بندة اتقضى وفجاة جاني الدوار بس اشد وجاني خوف مرررره شديد وقعدت ارجف واجس اني بموت الحين وزوجي يهدي فيني ولافي فايدة طلعنا بسرعة وركبت السيارة وقعدت اصيح ( الحقني مدري وش فيني احس بشي غريب في جسمي احس بموت الحين ومكتومة مررررره ) زوجي مااعطى الموضوع اهمية قال عادي مافيك شي تعوذي من بليس المهم قعدت اقرا على نفسي لحد مارجعنا بيت اهلي وجاني الدوار مره ثانية والخوف الشديد واركض مدري وين اروح ابوي كان مار قلت ابوي تكفى الحق علي مدري وش فيني اقرا علي ابوي طار عقلة وخاف وقام يقرا علي وجت امي وهدتني قالت مافيك شي الانسان معرض لاي شي هذا خوف صابك يوم دحتي وبيروح عادي كلنا ندوخ لاتصيرين ضعيفة قومي وصلي وانسي الوسواس مافيك الا العافيه المهم هديت شوي ورحت اقرا سورة البقرة وارتحت ونمت وانا حاسة ان وضعي مو طبيعي في شي غريب بس مدري وشو .. المهم بعد كذا صرت اشوف الدنيا كنها خيال مدري شلون محد فهمني وجاني فزع ليلي كل ماانام دقيقتين افز واشوف الدنيا كني ماني فيها واستغفر وانام احس كني مو حية ولا ميتة مدري شلون وصرت اتوهم بكل الامراض سحر وعين وحسد واكتئاب وبديت اخاف من كل شي قعدت شهر كامل مااطلع من الشقة وخفت انتحر وخفت افقد السيطرة على نفسي زوجي مايدري وش القصة كنت احاول اجامل وابين ان مافيني شي وكان يطلعني بس اذا نزلت خطوتين من السيارة رجعت لها مااقدر حتى ادخل بقالة .. تبهذلت ابغى انبسط واتمشى ماقدرت .. المهم قلت لاهلي تكفون عالجوني مدري وش حصل لي بس كلهم على بالهم اوسوس واتدلع قعدت شهرين اصارع واعاني ولااحد يدري كل ليلة اتهجد وابكي وادعي والادعية اربع وعشرين ساعه في يدي .. امي اقتنعت فالاخير ان قيني شي لاني نحفت ووجهي صار شاحب وبس شاردة افكر واخاف وارجف قدامهم .. المهم قامت امي تدق على الشيوخ وتسأل عن الاعراض اغلبهم قال اضطراب نفسي عشانها تزوجت ودخلت حياة جديدة انا على بالي عشان كذا .. محد جاب طاري الموقف اللي صار فالشقة نسيناه اصلا .. جا شيخ قرا علي قال مافيها الا العافيه بس فيها خوف لازم تطرده .. المهم انا قعدت ابحث عن الاعراض لحد ماشخصت مرضي بنفسي وبديت اعالج نفسي وامي قالت لها حرمة ان الموقف هو السبب وان اللي فيها روعه لازم تتعالج .. المهم جابت لي امي زيت مقري فيه اول مااجطة ثواني ارتاااااااح وتزول نوبة الهلع وترجع الدنيا في نظري زي اول وانام .. من كثر ماتعبت من المرض عزمت على العلاج وحطيت لي برنامج كامل لمدة شهرين لحد ماخف 99 فالمية .. كنت كل ليلة احط الزيت واتهجد وادعي وانام وكنت اداوم وارجع انام شوي واصحى واتروش بسدر (خلطة الرومي) واقرا سورة البقرة بعدها والرقيه .. واذا اذن المغرب تجي امي تصب على ظهري (شوية سدر مع موية مخلوطة ) من اول فقرة في ظهري لاخر فقرة لحد مااشهق.. وكنت فالليل اجيب موية واقرا عليها سبع مرا اخر سورة البقرة كل قراءة بشربة .. واعطتني صديقتي رقم دكتور نفسي يسوي جلسات عن طريق الجوال كل جلسة بمية ريال ويعالجك سلوكيا مايصرف ادوية ابدا كان جدا رائع وفادني كثير بس اربع مكالمات مااحتجت اكثر وكنت اشرب عصفر مع موية مقري فيها مرتين فاليوم وعلى هالحاااال شهرين لحد ماتشافيت تماما وصرت اطلع واسافر واجي حتى يوم كنت في قمة المرض كنت اغصب نفسي واطلع ودايم اروح لصديقاتي واروح حفلات وعزايم عشان انسى بس يوم بديت بالبرنامج العلاجي حقي اعتزلت الناس بس الدوام والبيت كنت عند اهلي مارحت شقتي .. سبحان الله اكثر علاج اثر فيني ونتيجتة فورية سورة البقرة كنت اقرها مرتين فاليوم .. الحين رجعت زي اول وكانت تجربة مريرة لاني كنت عروس بس ربي سبحانة عوضني بعدها بوظيفة حلوة وزوجي جاه نقل من جدة الى الرياض وصرت جنب اهلي والحمدلله على كل حال ..
اتمنى ماطولت عليكم بس الهدف هو الاستفادة واتمنى قد ماتقدرون تتجنبون الادوية الا في حالات حرجة جدا مثل التشنجات .. لان القران هو الشفاء والدعاء هو سلاحنا .. انا عانيت سبعه شهور بس الصبر نهايتة حلوة ..
بعد كذا رجعت زي اول بس احيانا تجيني ضيقة خفيفة وتروح شي طبيعي ونادرا تجيني افكار سلبية بسيطة بس اطردها والحمدلله

المصدر: نفساني

قصتك شبيهة بقصتي, موقف مرعب, وبعد بفترة كبرت الامور عندي وصارت هلع ورعب..
بس انا ما عرفت اتعالج .. كنت بالاول نشيطة وما خليت طريقة سمعتها الا وطبقتها.. وبعدين بعد ولادة ابني, زاد الموضوع وانتكست.ز وحاليا ما في طريقة مداومة عليها.. لاني نوعا ما فاقدة للامل

الحمد لله الدي من عليك بالشفاء والله يسعدك ويرزقك بالدرية الصالحة اللي تونسك وتنور بيتك يا رب قصتك جميلة ويارب تكون عبرة لمن فقدو الامل في الشفاء واهم شيء اتخاد الاسباب والباقي على الله ومبرووك عليك الشفاء

أسأل الله أن يتمم عليك الصحة والعافية ويجعل حياتك سعادة في سعادة

أختي ممكن ترسلي لي رقم المعالج النفسي
ولك مني الدعاء وخالص الشكر

ممنوع نشر الارقام ..!!

الحمدلله على سلامتك اختي ....

ما شاء الله ...عطيتيني امل كبير بالتخلص من هالمرض ..... اهم شي اننا ما نيأس ..

شكرالكي

مين المعالج.........نا تحسنت ...... لكن حاسه هليومين اني ملخبطه

هلا فيكم جميعا ومشكورين على ردودكم .. اتمنى اني اعطيتكم الامل من جديد لان الانسان ضعيف يبغى العافيه بسرعه وييأس بسرعه .. انا جتني حالات يأس كثيرة وياما بكيت ايام وليالي وفقدت الامل في بعض الاحيان وحسيت اني خلاااااااص انتهت حياتي ودخلت عالم المجانين لكن كنت دايم احسن الظن بالله وادعي واتصدق وانا في امس الحاجة .. الصدقة عظيمة (داوو مرضاكم بالصدقة).
دعواتكم لي بدوام العافية والذرية الصالحه

الدكتور اسمة محمد منذر .. له موقع وعيادة الكترونية يعني مايحتاج انك تروحين له ابحثي عنه في قوقل وراح تحصلين كل المعلومات اللي تحتاجينها .. بالتوفيق

اتمني لكي الشفااء الدائم اختى الغالييه
وقصه رائعه ومعبره جدا