انه الوهم

المشاركة الأصلية كتبت بواسطة عبدالرحيم يوسف

يا ناس انا عندي سؤال محيرني

انتكاستي الها اكثر من 20 يوم (مشان اكون منصف وما اهلعكم زيادة الايام الاولى كانت صعبة للغاية لكن شوية شوية خفت علما باني ما بتناول ولا نوع دوا سوا حشيشة القلب ) نرجع لسؤالي اللي هو ما في نوبة حقيقة شديدة بقدر الوسوسة فقط معقول انو كل هلقد الامراض النفسية مرتبطة مع بعض من اكتئاب وهلع ووسوسة وقلق عام وحاد ؟؟؟؟؟ لانو كل هذه الاعراض شفتها بالعشرين يوم هذول وكل واحد فيهم ازنخ من الثاني

الوسواس بخليك عديم ثقة بالنفس لدرجة انك تخاف تشرك من غير حول منك ولا قوة ولا ارادة
الاكتئاب بكرهك نفسك والدنيا
الهلع ما بدي احكيلك عنو خلي بنفسكم
اما القلق باعتقداي هو المسؤول الاول والاخير والمدبر لكل هذه الامور خاصة الاعراض الجسدية المصاحبة من ضيق نفس وكتمة في الصدر وتنميل في الراس ورجفة في الجسم واحلام مزعجة وغيرها

ودائما وابدا تشعر انك في مرحلة الاستعداد لشو ؟؟؟ مش عارف

السلام عليكم اخي كيف امورك ان شاء الله افضل؟ انا عند اول اصابتي بالقلق ومسلسل نوبات الهلع كنت اظن انه اكتئاب فكان يغلب علي البكاء والحزن واليأس لكن مخلوط بخوف بدون سبب فذهبت للطبيب لاعرف ماهية مرضي فسألني سؤال هل تخافين اول ام تحزنين؟ اجبته اولا اشعر بخوف ثم حزن مطبق فقال لي قلق مصحوب باكتئاب واصابتني حيرة واستغراب اثنين معا يو والثالث مجانا هههههه يعني عالبيعة والله شر البلية مايضحك اذا كلها تابعة لبعض ولكن احدهم يغلب عاﻵخر فنحن كما قلت القلق هو اساس المصائب عندنا ويليه باقي المرفقات فان تخلصنا ل منه تخلصنا من البقية الأشرار،حتى الطبيب لاحظ دهشتي وقال لاتستغربي الاثنين اخوان هههه اي القلق والاكتئاب،انا الاحظ هذه الايام ارتفع عندي الاكتئاب،الله يشفينا اجمعين

وكذلك اخي هذه مرحلة الاستعداد والتأهب بدون سبب معروف هذه من اصل واساسيات مرض القلق يعني لاتحتار ولا تهتم،لم مادام هناك تحسن من ناحية الأعراض ان تجرب العلاج السلوكي؟

انا مبارح كان عندي موعد للطبيب النفسي وما رحت صار عندي قناعة انو نحنا اقدر منهم على مواجهة المرض ولما فكرت اخذ علاج معرفي سألت عن سعر الجلسة حكولي سعر بالنسبة الي اظنه خرافي 30 دينار اردني على الجلسة مشان تقلي اتنفس من منخارك وطلع من ثمك (حلي عني ياااااااااا) بعطي مليون مثلها جلسات سلوكية
المهم انو انا في صراعات بين الشفاء والمرض ساعات تلاقيني ما شاء الله عني اهلع الهلع وساعات تلاقيني استنى وقلق منو بس ما بيجي نفسي يجي نفسي اوقع على الارض منو نفسي افقد السيطرة مشان انهي معو

صار عندي قناعة انو الهلع عرض وليس مرض ممكن يكون المرض موجود في اي جزء من الانسان

كمرض روحي او عضوي او اضراب في الافرازات

من احقر الاحاسيس هو لما أكون في حالة ضعف في يوم من الايام او في ساعة من الساعات بيجيني الفكرة انو مستحيل ارجع مثل اول حتى اني بستغرب من الاشخاص الاسوياء

لكن بطمن نفسي بانو مش هذه الطبيعة اللي خلقنا عليها سبحانه وتعالى طبيعة الانسان انو بينسى ولذة الحياة تنسي التفكير بكثير من الامور

معلش حاسس اني بطلع من فكرة لفكرة مش قادر اسطر تفكيري من كثر ما عندي من الكلام عن احاسيسي

اخي عبد الرحيم انت من الاردن؟

اها انا من الاردن

السلام عليكم اخوي كيفك؟ اهلا وسهلا فيك كنت اتمنى ان اجد احد في المنتدى من الأردن حتى نتبادل تجاربنا بالنسبة لﻷدوية واﻷطباء المحليين،هل استطيع ان اسألك ما اﻷدوية التي كنت تستخدمها ومن طبيبك هل تعرف معالجين سلوكييين مجربين؟

اللي كان طبيبي هو الدكتور محمد الدباس في شارع الخالدي اعطاني في الاول العلاج زيلاكس سعر جلستة اول مرة 40 دينار والمراجعات 20 دينار
بينصب تركيز الدكتور واسلوبة على نسبة التحسن على الدواء في اول جلسة قبل سنتين قالي انت مش بحاجة لعلاج سلوكي بعد النكسة قررت اني اجرب العلاج السلوكي وسألت الاختصاصية اللي عندو وقالتلي سعر الجلسة بتراوح ما بين 30 الى 50 دينار كثير غالي هيك المهم بعديها قررت اني اترك العلاج عند الطبيب حسيت انو التحسن على عشبة القديسين اسرع من الدواء علما بانو الزيلاكس والفافرين واغلب الادوية النفسية بتعمل على زيادة معدل السيروتنين وهذا نفس عمل هذه العشبة والي تقريبا 3 اسابيع بستعملها وصراحة الفرق كبير يكاد يكون كل يوم افضل من اللي قبله

شكرا على ردك اخي الكريم،الدكتور محمد بسمع عنه كتير انه ممتاز واتصلت مره فيهم عشان اسأل عالجلسات السلوكية فعلا انصدمت اول مرة 40 دينار بعدين 20 اكيد اسعار خيالية انا عني مابقدر اخدها،الزيلاكس بديل اي دواء؟والفافرين انا دكتوري مانصحني فيه حكى لي للوساوس مابينفعني،انا كنت اول شي عند عصام ابو فرحة بجبل الحسين وبعدين غيرت لخليل ابو زناد كمان بجبل الحسين واعطاني بالبداية يونيروكس بديل السيروكسات والان على فلوسيم بديل البروزاك،بتنصحني اروح للدكتور محمد ؟

الدكتور محمد الكل بيحكي عن انو افضل دكتور نفسي لكن

انا عن نفسي او قررت ارجع لطبيب نفسي مش راح الجأ للدكتور محمد لاكثر من سبب لاحظتهم خلال فترة علاجي

وصراحة ما اجزم انو فترة شفاءي الاولى كانت من العلاج لاني في كثير اسباب اخذتها للعلاج وما اعرف في اي سبب ربي وضع الشفاء

مابدي احبطك بس حابة احكيلك تجربتي بالنسبة لعشبة القديسين انا صارت معي انتكاسة بعد ماتركت اول علاج مع اول طبيب وضليت 3 اشهر احاول ماارجع للادوية وجربت العشبة بس الكبسولات لمدة شهر وماصار اي تحسن بالعحس زادت الحالة ههههه يمكن انا تركيبة جسمي غير عنك او انا احكيلك ايحاءية كتير وبتاث بتجارب الباقيين المشكلة السلبية مش الايجابية،بعدين رحت عند الدكتور خليل والله انه كان قمة في التفهم والمراعاة وفرجيته العشبة حكى لي كبيها الله يكرمك بالزبالة ههههه مابتنفع يمكن انا كانت نكستي قوية وبحاجة لعلاج اقوى بس انت ماشاء الله عليك مبين عليك عندك ارادة وكمان كل حالة بتختلف من واحد للتاني يمكن انت حالتك اخف واعراضك اقل،شكرا الك وان شاء الله اسمع انك تركت كل العلاجات والاطباء

اكيد مش كل شي السمعة والاسم انا جربت هالاشي بتعرف اول مايكون تعبان الشخص بيدور علي اي حل للخلاص وانا تشتت عالاخر كنت ادور اول شي على معالج سلوكي يعني بس جلسا وكنت فعلا منهارة بمعنى الكلمة بحثت وبحثت ومالقيت الا واحد حتى مش حابة احكي انه اخصائي حسبي الله ونعم الوكيل ،اسمه نايف بالجاردنز مابدي اكمل اسمه والله اعطاني 4 جلسات هبل بهبل غير انه عصبي واسلوبه اسلوب غير متحضر في التعامل مع المرضى وهمه بس المصاري الدفع والسمسرة قبل البدء،وجلسته 5دقائق لا اكثر فقط تمرين تنفس يمكن طفل صغير بيعمله لحاله ههههه حتى اهلي عصبوا لما شافوا اسلوبه وطريقته والله اخوي شوي بده يضربه هههههه،وغير واحد بالحسين بيطلع بالتلفزيون ههههه حكيت يمكن استفيد مش مشكلة المصاري ياسلام عيادة فاضية بيجي عالطلب ههههه غير الاشياء التانية اللي شفناها بالعيادة لاحول ولاقوة الا بالله يومها هربنا انا واختي وحلفت ماترد علي تاني مرة،لا اسم ولا شهرة كله حكي فاضي والله اني استفدت هون بالمنتدى اكثر من كل هالخرابيط،معلش وجعت رآسك بس بدي افضفض وانبه المرضى من الاحتيال والنصب.

مش موضوع الحالة اخف او اقوى

هذا اللي خلاني اقتنع انو الهلع عرض لمرض يعني مش هو المرض نفسه لانو كل شخص بيتشافى بطريقة او بدواء غير الثاني انا اتوقع اللى عندي كان نوع من انواع الاكتئاب اللي تفجر بشكل نوبات القلق وما وصلت في مرة اني استعجلت ورحت للطوارى ومشكلتي بتوقع الهلع والوساوس بذكر اخر مرة صابني تسارع نبضات من 3 اسابيع ومع ذلك القلق ما كان يفارقني ابدا والان على مدار اليوم القلق متقطع ومش بالقوة اللي كانت في بداية الانتكاسة

طيب الحمدلله شكل حالتك مختلفة مادام هيك ماتعتمد على اﻷدوية لانه واضح انك مش محتاجها،ودليل ارتحت على عشبة القديسين ماتتورط بالادوية ادا كنت قادر تسيطر على حالك،انا كتير تعبت وكنت اروح للطوارئ واكسجين وتحاليل والخ يعني ما تشبه حالتك لحالة حدا حرام بتضيع حالك،كل شخص اله وضعه وظروفه والسن والجنس وكل هاي الامور بتختلف عشان هيك انت ادرى بحالتك وطريقة السيطرة عليها،الله يشفيك ويشفينا اجمعين وتكون نهاية ايامك مع المرض يارب،ولو حابب تتأكد بنصحك بالدكتور خليل انا ارتحت له كتير ولعلاجه بعدين مش مادي وبياخد وبيعطي مع المريض وطويل بال وكشفيته 20 اول مرة بعدين 10.

اذا حسيت اني بحاجة لدكتور راح اطلبك معلومات الاتصال فيه
وكثير منيح انك نبهتيني للمعالجين السلوكيين لاني ما جربتهم وان شاء الله ما احتاجهم

اليوم خطرتلي فكرة منيحة كنوع من الرقي بالنفسية بدي اتبع عبادة معينة انا ما بعملها والتزم فيها لانو مجرد ما خطرتلي الفكرة حسيت بانشراج كبير الي شهر ما حسيته وان شاء الله ربنا ما هيضيعنا

الله يوفقك ويشفيك وان شاء الله نسمع عنك اخبار طيبة ومفرحة ,حلو انه الواحد لحاله يعرف شو بريحه وكيف يتعامل مع حالته لانه ماحدا رح يساعدنا بعد الله سبحانه وتعالى الا انفسنا, انا كتير بيني وبين حالي بتساءل طيب لو مافي ادويه لحالتي متلا او وضعي لاسمح الله مابيسمح اتعالج واشرب ادوية او اهلي او اي حدا بيمنعني متل بعض الاعضاء شو رح يصير بحالي اكيد حصبر واقاوم وانتظر الشفاء بدون ادوية لما ربنا سبحانه وتعالى يريد,انا حاضرة باي وقت بدك معلومات عنه بعطيك اياها واي اشي بقدر اساعدك فيه انا جاهزة,وخليك ع حماسك ولا تيأس,تحياتي