نسى زوجتــــــــــــــه

نسى زوجتــــــــــــــه

	هذا واحد توه معرس وخلصت الزفه والامور اللي في القصر.. اخينا في الله شغل يعني اخذ حرمته وركبوا في السياره .. ودعس لديرتهم يعني اهل العروسه في منطقة وهو ساكن بمنطقة ثانية .. والبنيه تستحي ومبوزة طول الطريق .. والرجال ماغير يسولف ويهذر والبنية سااااكته .. ماااااحولك احد .. يعني بالعربي بنت اول مره تشوف رجال أكيد كيق بيكون شعورها,, ولابعد من اول ليله ماسكه خط معه كملت هع هع .. المهم الرجال يأس من البنت انها تتكلم .. وقال يا ولد ما وراها هذره اشغل المسجل وامسك الخط .. عاد هي طمرت على المرتبه الي ورى عشان تنام عشان يخف عليها وجع الفراق .. الين يوصلون محطه المهم الرجال ما وعى الا هذيك محطه ويصفط عندها ,, وينزل عند البقاله وياخذ له كيس فصفص وكم ببسي حق الطريق ,, هو كان وده ياخذ له شريط لمحمد السليم عشان يسليه في الطريق بس خبركم توه معرس وبايخه مشغل محمد السليم الناس تشغل عبد الحليم ولاام كلثوم .. المهم البنت على نزلت زوجها الا نزلت لدورات المياه حقت الحريم الي عند المسجد الي جنب البقاله.. قالت يابنت بيمديني اطمر واخلص وارجع قبل لا يرجع هو من البقاله,, المهم المسكينه راحت واخذت وقتها .. اخينا في هالوقت رجع للسياره وعلى باله حرمته في المرتبه الي ورى وخبركم عبايه سودا واخر الليل,, ما انتبه انها مو في السيارة وهوشغل ودعسسسس البنيه المسيكينه طلعت وتناظر يا بنت وين السياره ... وتتلفت ما تشوف غير الهنود حق المحطه وحق البقاله,, عاد تخيلو الصدمه يوم عرفت ان زوجها دق سلف ومشى والبنت المسكينه حتى في نفسها مهيب راضيه تصدق انه مشى .. جالسه تتأمل انه يمكن راح منا ولا منا وبيرجع .. شوي ما وعت الا ذاك الجمس اللي مقبل يوم وقفوا عند البقاله الي جنبها ,, وتقز الحريم اللي في الجمس ... قالت زين عائله وتروح وترمي روحها على الحرمه الي قدام .. وهي ام العيله وتقول لها خالتي انا داخله على الله ثم علييك .. وهذي قصتي والعجوز مسكت راسها وقالت .. يابنيتي انتي تعرفين سيارة زوجك .. قالت ايه اعرفها .. قالت قومي اطمري نلحق على زوجك ويعبون بنزين ويدعسون وراه .. نعود الآن لصاحب الفصفص اخينا في الله مريح وماشي .. بعد ما لقوه في الخط على بعد نص ساعة عاد تخيل حبيب القارئ انك على طريق و فجأة وراك جمس يكبس بالنور بشكل مخيف يبيك توقف وش رده فعلك؟؟ اكيد الرجال دعسسسس قال ياولد هذولا مهابيل بيضروني ومعي عروستي .. ويااافشيلة اذا انطقينا.. والجمس وراه داعس يحاول معه انه يوقف .. المهم الذهين اللي يسوق الجمس عرف وش يسوي .. فقام يولع نور الجمس اللي في الداخل عشان العريس يشوف ان اللي في الجمس عائله.. وأخيراااااا انتبه و يوقف ... قال وش عنده ذا ونزل وهو معصب ابو الشباب عاد من اللي متوهق في هالموقف .. اكيد هو راعي الجمس يقول في نفسه وشلون اقوله ان مرته معنا؟!! يبي يجيبها بأسلوب تدريجي عشان العريس ما ينصدم .. خبركم مثل هالموقف وش بيقولون عنك اهل العروسه ... اخذت بنتنا وضيعتها ولله ان تلزق فيك السالفه طول عمرك والعالم يتمشووون ولا عندهم سالفة غيرك .. تصير علك دائم الحلى .. ولا تصف يم علك ابو سهم .. يتشمتون فيك.. المهم راعي الجمس سلم وقال له اخوي ما كأنك مضيع لك شي قال له العريس ... لا ولله ما ضيعت شي .. قال له تأكد قال العريس ... وشلون قال راعي الجمس .. رح طل في سيارتك شف في شي ناقص لك العريس قام يوسوس حتى المشكله مرته ما جت على باله المهم راح ودخل خشته داخل السيارة وقال يابنت في شي طاح مننا وحنى في المحطه محد رد عليه ويوم لون وجهه بدا يميل للكرت الاحمر.. ووووووووين راحت الحرمه ورجع لراعي الجمس وقال هات السالفه 00 قال يا ولد مرتك لقيناها عند المحطه انا واهلي 00 عاد العريس كل انواع النفاضات نزلت عليه تلعثم ولا قدر يتكلم المهم راعي الجمس راح وقال للعروسه يلااا طسي عند زوجك شوفيه متصرمع عليك.. المهم العروسه ركبت مع زوجها في السياره وانطلق لسانها اللي كان مربوط وقامت تتعذر له ..وتقول لا تزعل مني.. عاديا شين التميلح .. توها تتميلح .. عاد انقلب الوضع صار العريس هو اللي مبوز طول الطريق والعروسه الي قاعده تبربر ما بقى الا انها هي اللي تسوووق .. المهم ترى هذي السالفه حقيقية وحصلت بالفعل ,, عاد لايجي لاتزوجت تخليها تركب ورى بسفر ارزعها قدام معك وبعد البنات مو يعني مستحيه ماتكلم اي مكان بتفرين له علميه قبل لاتروحين منا ولا منا هع هع .. تحياتي..

المصدر: نفساني

مساء الخير :

أخوي وافي يعطيييك ألف عافية قصة طرييفة و رائعة
من جد أستمتع بقرأتها و سبحان الله حصلت مثل هالمواقف لناس
أعرفهم بس مو في سفر الحمد لله كان مداها المسيكنة طار عقلها << قلبهارهيف >>
وين ضيعها زوجها في شهر العسل ضيعها في ماليزيا هههههههه صدق والله
ولكن لغتها الإنجليزبة نفعتها و عرفت تدل الفندق و لا يفوتك وش سوت بزوجها
خلته ما يسوى ريال ههههههه ...

ألف شكر أخوي وافي ...
سمية القحطاني ...

مفيش غلط على العريس ادى جزات الى تنكسف من زوجها

والله حركه ماضحكت الا على زوجها يوم وقف منصرع عليهم
عاد قولوا لراشد لا يسوي في حرمته وينساها
خخخخخخخخخخخخخخخخخخخخ

ههههههههههههههههههه

عرسان اخر زمن

تحياتي

قصة غريبة فيها شيء من الخيال

مشكورين على المرور..
اخي رياض الاسمري.
ليش فيها شي من الخيال؟