تلومني على وفاة والدي

تلومني على وفاة والدي

السلام عليكم ورحمة الله وبركاته

انا جديدة في منتدي نفساني كان عندي علم بالموقع وكنت اقرا وأستفيد كزائره

اليوم اتيت افضفض عن هم لا اعلم هل أقول هم أم ضيق ولكن الله يكون في عوني وعون الجميع

توفي والدي الغالي العام الماضي واعلم مدى وقع المصاب علينا كعائله واعلم في نفسي مدى الالم الذي امر به ولكني مفوضه امري لله
المهم قبل دخول والدي المستشفى حدث امر وشجار بين والدتي وأختي في غرفة والدي وأمامه وانا كنت موجودة وكل ما حدث سببه تراكمات وكبت نفسي لأننا كنّا نرعى والدي نحن وامي كانت تتعب وتشكي تعبها ولكن يومها سبحانه لا اعلم لما حدث هذا الانفجار كقنبلة موقوته وانفجرت ومع النقاش علت الأصوات اختي قامت تبكي وانا كنت أقول شو اللي صاير كلنا ليش استويتوا ما تستحملون شي وغير ذلك ولكني كنت أقول الصراحه واعلم ان وقع الكلام لن يهز لا امي ولا اختي بل والدي فخرجت من الغرفة ووالدي كان مقعد وكبير في السن ،،، بعد يومين صحيا الصبح لان امي راحت المستشفى عشان أدوية ابوي ،،، رحت قعدت عن ابوي وأمامه ولكن لاحظت عليه انه تنفسه صعب وامي قالتلي انه ما اكل شي من الصبح فحاولت اشربه ماي لكن سبحانه الماي ما ينزل بحلقه رحت اصحي اختي واقولها ابوي فيه شي فصحت بعصبية وقالت مافيه شي بس إنتوا ما عندكم طوبة بال وراحت تشربه ماي اقولها ما ينزل الماي وراحت غرفتها حاولت أكلم ابوي أحرك راْسه أحرك أيده مافي استجابه فاتصلت على امي عشان ترجع وقمت أدور على رقم اقرب عباده اذا في دكتور بيحضر البيت ،، ورحت لأختي مره ثانيه اقولها خل ننقل ابوي المستشفى تنفسه صعب قالت من بينقله ومن بيدفع استغربت من عصبيتها وردت فعلها في ذاك الوقت صرخت عليها ابوي تعبان وهي في خبر خير اصعد فوق اجيب ارقام المستشفى التقي باخوي الكبير يقولي شو فيج أقوله ابوي تعبان والأخ ردت فعل بارده ولا نزل يسال اتصلت على المستشفى والا الله رحمني بدخلة اختي الكبيرة جايه من بيتها وقالت انا حاسه في شي قالت قومي بنوديه المستشفى وانا في قمة غضبي على اختي واخوي رحت انا وأختي وشلينا ابوي وقلت وإذا صار على ابوي شي أني ما اسامحهم ،،،، ابوي كانت حالته صعبه وكل يوم يمر عليه في المستشفى حالته تسوء ،،، ليوم قالتلي فيه الدكتوره الوالد وضعه صعب وفِي اي لحظه ممكن الله يأخذ امانته كل شي بيده الحين ما قلت شي نزلت دموعي وطلعت ويتصل بي اخوي اللي اكبر مني من دوامه يسألني شو وضعه وسمعني أصيح قال انا ياي ،،، وأختي اللي انا معصبه عليها اتصلت بي وبالتالي شو وضع ابوي ( لانه احنا نتناوب على الزياره) وكنت أصيح وقلتلها كل شي وقامت تصرخ وتقول الدكاتره ما يعرفون شغلهم وسكَّرت الخط رحت لامي في الانتظار قلتلها انا شو بيدي يا امي اذا حالته ما تحسنت اذا الله أخذ امانته شو بيدي انا الدكاتره حاولوا الامر بيده رب العالمين ،،،، ومر أسبوع الحال مثل ماهو ابوي دخل غيبوبه ،،، حان موعد رحيل الغالي بعد صلاة الفجر يحاولون ينعشون قلبه لكن قالت الدكتوره الله يرحمه ،،، الله يرحمك يابوي
اطلت في الموضوع ولكن اهم نقطه بعد التوضيح اختي من بد من في البيت تلومني على ماجرى وفِي اول ايام العزاء تصرخ علي بأنها لاتريدني ومن 4 ايام انا في صمت بسببها لانها كررت القول بسبب موقف مع امي وإني مثل ما تسببت في موت ابي ساتسبب في موت امي ،،، انا شو بيدي كنت أرد عليها في المرات السابقة ولكن هذي المره سكتت و التزمت الصمت وأتفادى الحديث معها

افيدوني جزاكم الله خير

المصدر: نفساني

وعليكم السلام ورحمة الله وبركاته

حياك الله وبياك اختي .. والله يكون بعونك ويرحم والدك ويطول في عمر الوالدة ويرزقك برها يارب


اختي الكريمة .. من الواضح بأن أبوك الله يرحمه رجل كبير في السن ومريض .. يعني ما كان في الخمسينات ولا في كامل عافيته وتسببتي عليه بشي هذا أولاً .. ثانياً الأعمار بيد الله يا أختي .. وأعمار هذه الأمة من الستين إلى السبعين وقليل من يتجاوز ذلك .. وفي النهاية الموت أمر مكتوب للبني آدم من أول ما خلق .. رزقه وعمره وشقي أم سعيد .. يعني إنتي ما كان في يدك ولا في يد أحد انك تمدين في عمره ولو ساعه وحده


الشيء المهم هو إنك تعرفين قدر الوالد الله يرحمه عندك .. وبذلتي جهدك في خدمته ورعايته ... ومو مهم رأي الغير .. المهم هو انك قدمتي قدر إستطاعتك .. ويكفي إنك انتي أول انسانة انتبهت له في مسألة تعبه ووقفتي جنبه حتى توفاه الله مع إن مسؤولية الذهاب للمستشفى تقع على عاتق الأولاد الله يهديهم وانتي سويتي اللي عليك وأكثر


وواضح إن اختك عصبية وغير منطقية في كلامها لما تلومك وتجرحك بالكلام بعد كل هالفترة .. ولكن ولا يهمك طيبي خاطرك وانا اخوك وريحي ضميرك ولا تأسين على شيء .. الشيء الوحيد اللي يؤسف عليه هو شخصية اختك ومنطقها مو شخصيتك ومنطقك وجهودك .. وأفضل شيء هو انك تجاهلتي الرد على مثل هالشيء الغير منطقي

لابد تحطين في بالك بإن فيه شخصيات تفتقد للأسلوب والعقلانية والهدوء .. وترحمين مثل هالناس وبنفس الوقت لا تتأثرين من تصرفاتهم .. بالعكس احمدي ربك انك مو كذا .. وارحميهم لأنهم بالشكل السيء هذا .. وهدوئك وصبرك ما يجيب لك إلا الخير والطمأنينة .. وانفعالاتها وعصبيتها وافترائها ما يجيب لها إلا الذنوب ونفور الناس منها .. فهل إنتي سعيدة بنفسك ؟ أو تتمنين تكوني مثلها ؟؟


بالتأكيد إنك سعيدة بما أنتي عليه .. لذلك حبّي نفسك وأعطيها حقها ولا تدخلك الشكوك من كلامها إنك قصرتي بشيء أو تسببتي في وفاة الوالد الله يرحمه


وبري بوالدتك وكوني أكثر هدوء في مثل هالأجواء ولا تسمحين بإن أي كلمة طائشة وغير محسوبة إنها تزعزع كيانك وتضايقك .. وكل شيء يقال ضدك ما يجيب لك إلا الخير .. وللأسف ما يرجع على قائله إلا بالذنب كونه إفتراء وأنانية


كوني قوية وأكثر إستكانة وهدوء .. وريحي ضميرك من طرطايش هالكلام اللي تجيك ... لأن كلامها غير منطقي وأليم الله يهديها ويعينها على نفسها ويكفيها شر لسانها .. ومالك إلا الأجر وثقي بأن الله نصيرك داااائماً وأبدا ضد كل إفتراء يصير عليك .. فقط كوني مستكينة وهادئة في مقابل هالأشياء

..

الأخ عبدالله سلمان

اشكر لك مداخلتك الطيبه

الحمدلله انني راضية بقضاء الله وقدرة و محتسبه وصابره بفضل من الله ومنته

المتعب في الامر ولذلك كتبت موضوعي أني في استغراب من ردة فعلها قبل وبعد وفاة الوالد الله يرحمه

انا سعيده وأشكر ربي أني كنت في وعي من امري وهذا بفضله سبحانه انه قدرني على اتخاذ القرار في وقت ممكن انا أكون منهاره فيه
لا ألومها وربي العالم بما في قلبي لاني اعلم مكانة والدي لديها ولن الوم احد في خسارته مصابنا جلل لان والدي طيب الله ثراه كان الحياة في البيت كان السند القوي والقلب الذي لن يتكرر في حياتنا ولكن الله اختاره ولله ما اختار ويارب مع الصالحين الاخيار من امتك في جنتك

اختي وانا وعدت نفسي امام الله ان أكون سند لها ولأمي بما أتاني الله من فضله ولكن في الأخير انا انسانه اضعف اتعب ولكن لن اهزم بسبب كلمه باذن الله ،،، يا اخوي الكريم الأولاد للأسف ليسوا قدر المسؤوليه وكم تمنيت ان يكون احد مثل والدي ولكن للأسف الكل تغير ومنشغل بنفسه والله المستعان