نفساني - عرض مشاركة واحدة

06-08-2012, 09:59 AM

والله كان الله فى عونى وعونك والله احب اقولك انك على حق وباطل فى آن واحد حقك وهو وان تتعفف وباطل ان تزنى وانى لأعلم مانعانيه فى هذه الحياة فالتعفف صعب باهظ الثمن لكى تشتريه والحرام سهل عديم القيمة والقيمه. فسأسرد عليكم موقفين مضحكين للتضح لك الصوره وعلى فكره انا من مصر ...

الأول
راكب تاكسى عادى جميل وبعدين وانا قاعد جنب صاحب التاكسى شفت بنتين قدامى ماشيين ماشية دلع وانت ادرى فطبعآ الشيطان خلانى علقت على الموقف وقلت لصاحب التاكسى هى البنات عامله فى نفسها كده ليه وبتمشى كده ليه! سؤال غبى مش كده! وتلاقى السواق بيقول فى عقل باله (ده عبيط ده ولا ايه) المهم رد علي المحترم وقالى العيب على الأم يا باشمهندس! قلت فى عقل بالى الظاهر ان الهندسه عمموها هههههه وكمل وقال الأم من دوول عايزه تجوز بناتها بدرى بدرى عشان ميعنسوش ويقعدوا جنبها جميل ولا ايــــه يعنى لازم البنت تهز عشان تعرف تتجهز قصدى تتجوز هههههه... رحت رادد على الباشمهندس اللى بيسوق وقلتله والله يا هندسه ربنا يكون فى عون شباب اليومين دول انا فى الثلاثينات ومش عارف اتجوز جواز اليومين دول فيه مغالاه فى كل حاجه واهل العروسه عايزين دايمآ مغارة على بابا متنقله يعوموا فيها, ومفيش دقيقيتن ولاقيت الهندسه بتاعنا راح مكشر على انيابه فليتحول الوحش وراح رادد وقال آمال حضرتك عايزنا نربى ونزغط ونكبر ونهنن وحضرتك تيجى تاخد على الجاهز. رحت اسبهليت ورديت وقلت هههه اكيد حضرتك ابو بنات؟! ورحت نازل وقلت فى عقل بالى (خليهم يخللوا جنبك) اهرب يا سمك هههههه.

الثانى
انا ما ليش اصدقاء كتيير وبعدين لما بخرج مبحبش الدوشه احب الأماكن الهاديه فقلت انا بقالى شغال كتيير تعبت بقى قلت اما اخد يوم اجازه قلت ام انزل روكسى (الكربه بالتحديد) واشترى شريط لفرقه اجنبيه بحب اسمعلها واقعد واسمع ورحت راكب حمارتى قصدى عربيتى (حمارتك العارجه تغنيك عن سؤال اللئيم) ههههه وركنتها ورحت اشترى الشريط وجيت بقى استمتع شويه من نفسى وبعدين وانا بحضر الشريط عشان احطه فى الكاسيت لاقيت حاجه غريبه شدت انتباهى واظاهر مش انتباهى انا بس لقيت قدامى خير اللهم اجهله خير بنتين اوعى كل شويه عربيه تقف قدامهم ويتكلموا معاهم ويسبوهم قلت فى عقل بالى هو فى ايه (ده جنان ده ولا ايه) ههههه راحو الموزز راحوا ملاحظين انى كنت مركز معاهم و لقيتهم اتحركوا ومدورين العين بالعين والسن بالسن وقلت فى عقل بالى (دوول جايلى انا بقى) اهرب يا سمك كلاكيت تانى مره رحت دايس بنزين على الآخر وزى ما بيقولوا يابــــا دوس بنزين دوس هههههه.

هقلك على نصيحه ليك وليه حاول + دينك انك تمارس الرياضه هتهد جسمك وهتخليك متفكرش كتييير فى الحاجات ديهّ!!!