المشاركة الأصلية كتبت بواسطة بخير رغم كل شيء

أبيات للشاعر حمد ابن جروان محارب السرطان
الذي حصل على الدكتوراه من غرفة التنويم ..
غربة ومرض وعلاج .. وهمة تناطح السحاب ..
صاحب مقولة :
قاتلوا من أجل أحلامكم وحتما ستصلون ..


من صوت غيرك مايعنيني الكلام الكثير
ولا عاد ابي من كلام الناس درس وعبر

قدامك العافيه واسلم وجعلك بخير
ماعاد فيها لمكسور المشاعر جبر

محتاج اسولف معك قبل النهار الأخير
ما أحتاج دمعتك لـ نزلتني فـ القبر

◇◇◇

يا سعيد شد الحيل واصمل وانا خوك
واصبر مثل صبري على جور دنياي

ادري مرضك اتعبك والناس بذوك
واللي تجيب اقصاك ما جابت اقصاي

تعبان لو تاطا على الجمر والشوك
بلواك والله ما تجي ربع بلواي

اللي يجي من فعل الأقدار مبروك
واللي غدتبه جعله فداك وفداي

الناس لو تملك ملايين وصكوك
في يدينها ما تملك ادواك ودواي

إذا ماحصلت المضره ما سرّوك
بشر ضعيفه كنها إياك و إياي

خلهم يشوفونا على مزح وضحوك
وش نستفيد إذا سمعوا بكاك وبكاي


◇◇◇◇

ياخالد الدنيا متاهات واحزان
ولـ أجالنا موعد ولـ عمارنا حد

وابشرك ماعندي الا سرطان
تخفيف لذنوبي ياربي لك الحمد

◇◇◇

لاتكابر في الظروف ولا تجزّع
قالها اللي ماتجزّع لو يكابر

ولاتشكوى للعباد ولا تفزّع
المشاعر عابره والعمر عابر

لو ضلوعك من عنا صدرك تمزع
من ترجاي البشر ويش انت خابر ؟

والعمّار محدده والرزق وزّع
من بطون الغيد لـ بطون المقابر💔

◇◇◇
ليال أشوف ان وضعي بخير وليال
أشوف وضعي صعب والموت جاني

يا ماصبرت وقلت بتزين الأحوال
وضاع العمر بين الرجاء والأماني

أهون علي أصبر لو أن المرض طال
ولا هو بيمرض واحدً من خواني

◇◇◇◇

الطب عيا .. والمقادير عيّت
وانا ماهمتني المقادير والطب

صابر وأراقب فرصةً ماتهيت
ولي قوة ايمان وعزيمه ولي رب

انا كذا ولا كذا ...أنسان ميـــت
ماعاد أبي وش لونك مجار أبي حب

◇◇◇◇

لو كان تجتاحنا الاحزان مع كل باب
ونعاني من المرض ومن الفقر والديون

نفوسنا عزاز والهقوات فوق السحاب
نصبر ونلقى الفرج في ( بشّر الصابرون)

◇◇◇

راسي على صكات الايام ما لآن
ولا كبرت سود المقادير همه

متحدين سود الليالي على شان
يحط له في قمة المجد قمه

وخسايره فيما تقدم الى الآن
ماله وعافيته ونومه ودمه

خسايرن واجد ولكني انسان
في نظرتي ماهيب حاجه مهمه

حتى ولو اني مريض السرطان
وش يخسر رجال! تدعي له أمه؟

◇◇◇

بالي من التفكير ماهو فاضي
عن زحمة الواقع اباخذ سلوه !

خلوني احجز تذكره للماضي
انا صديق الذكريات الحلوه !

◇◇◇◇

مؤمن بالقدر والصبر اتاخذي
مابعد ضيق الصدور الا سعتها

وش يضيق خاطري والارض هذي
كل حيٍ فوقها يرجع تحتها

◇◇◇◇

بخير ياللي تنشدني عن أخباري
نشدتك ومواصلك (جرعه علاجيه)

ولا المرض ماعتبرته ظرفي الطاري
عادي وتبقى الخطوره منه عاديه

مادام ربي هو اللي كاتب اقداري
والله مايحصل الا ماكتب ليه

بس انشدو عن طموحاتي ومشواري
امن الصفر للـ المنصات الا ماميـه

وظروفي اللي خذت من عمري اجباري
هي نفسها اللّي خذتني للنجوميّة..

يعني: تزيد تعبي ويزيد مقداري
اضحك على ذيك والاّ ابكي على ذيّه..