|
اختي من ذوي الاحتياجات الخاصة ومرضها من 5 سنوات
السلام عليكم
كيف حالكم يا اخواني وخواتي
بذكر لكم قصه اختي وافيدوني وش الحل
عندي اخت من لما انولدت وهي عندها نقص في الذكاء
عاشت طول عمرها ما تشتكي من اي اعراض نفسيه
قبل خمس سنوات فجاة صارت ما تحب تطلع من غرفتها
حتى ما تجلس معنا على سفرة الاكل وبعدين صارت تبكي طول الوقت ورافضه تاكل اي شي
هنا عرفنا انه فيها شي مو طبيعي راح الوالد رحمة الله عليه واختي الدكتورة نفسيه
ولا استفادت من علاجاتها شي وبعدين راحو لمركز البروفيسور طارق الحبيب مركز مطمئنه بالرياض
هي كانت تاخذ سيروكسات من الدكتوره اللي قبل الدكتور طارق اضاف لها معاه ادازيو
وحولها على دكتور عنده مركز يتابعون معاه الاحتياجات الخاصه
استمرت اختي على العلاج الفتره الاولى تحسنت
علما جرعتها كانت حبه من سيروكسات وحبه من ادازيو
بعدين صارت عنيفه وعدائيه وعنيده جدااا
لدرجة تضربنا وتمد يدها علينا وتصارخ..
كلمنا الطبيب قال خففو جرعة سيروكسات خففناها
رجعت لها الخوف والاكتئاب بعدين قال ارجعو لجرعتها القديمه
واستمرت عليه ثلاث سنوات وكل مالها تزداد عدائيه وعناد
وصارت التعامل معها صعب واختي ابدا شخصيتها مو كذا
هي هاديه جدا وتسمع الكلام ومؤدبه كثير
بعدين الادازيو اختفى من الصيدليات ما لقيناه ابد
ووقفت السيروكسات بالتدريج من قبل لا توقف السيروكسات
صارت عندها حاله جديده فجأة تصير حركتها كثيره
تدور بالبيت ترمي الملابس بالارض ترفض تاكل ترفض تدخل دورة المياة الله يكرم الجميع
تجيها هالحاله كم يوم بالشهر وتروح وقفت من سيروكسات برمضان
من بعد عيد الفطر صارت عندها حاله زي ما تقولون حالة هيجان
تدق على ابواب البيت ما تخلينا ننام تكسر بالمطبخ نفس الشي رفض تام تدخل دورة المياة الله يكرمكم رفض تام للاكل
وصل الموضوع الى انها ترفس ابواب البيت برجولها وكانت ما تنام ابدا
رحنا لطبيب نفسي ثاني وصف لها اولينزا 5 مل حبتين مع بعض
قال راح يهديها ويساعدها بالنوم ويخفف من العناد
اول يومين اول ما تاخذ العلاج تنام كم ساعه نوم عميق
اول ما تصحى هاديه ما تما ساعتين ثلاث الا وترجع لها الحاله اللي قبل
تواصلنا مع الدكتور وصف لها ريدون 2 مل حبتين حبه صباحا وحبه مساءا
خف الهيجان نوعا ما وصارت ترضى تروح لدورة المياة وبدات شوي تاكل
لكن مشكلة النوم والقلق مستمره قبل 10 ايام تواصلنا مع الطبيب
قال ارفعوا جرعة اولينزا الى 3 حبات يعني 15 مل
ومشينا على كلامه من كم يوم بعد ما رفعنا الجرعه
صار ينزل من فمها لعاب كثير الله يكرمكم وصار عندها رعشه بالجسم وبصعوبه تتحرك
وهاليومين مو قادره تمضع الاكل اذا دخل شي بفمها يطيح
مره مخوفني وضعها سالت عن الطبيب الاسبوع الماضي
قالو عنده اجازة بكرة الثلاثاء راح يكون موجود ان شاء الله
مين مر بمثل حالة اختي وتحسن علما انها لليوم ما تنام الا يا دوب نص ساعه باليوم
ومين جرب اولينزا وصارت له هالاعراض وكيف تصرف
افيدونا الله يجزاكم خير
|