نفساني - عرض مشاركة واحدة - ألم قلبي اتمنى ان يتابعه اخصائي لانني اريد ان ارتااح

13-02-2004, 02:13 AM

قوة ... اشلونج ... شريت مونيتور يديد ب 35 دينار وربكبته بروحي ... لو بنطر ذاك وذياك جان يتركب بعد شهر ... المهم ... نرجع لحوارنا ... تتذكرين وين وصلنا ... ( كيفية تجنب الشخص بعض طبائعه السلبية التأثير وابدالها بأخرى اكثر ملائمة للوسط الذي يعيش فيه وللأشخاص الذين يتعامل معهم ) ... شوفي ... طبعا كلنا تحكمنا غرايز ورغبات وحاجات مانقدر نشبعها بكل وقت وبالطريقة اللي نبيها بالضبط ... والامثلة وايد ... مثال بسيط ... واحد بالسوق وفجأة حس بالنعس ... ماراح يقدر ينام بالسوق ... وراح يحس بالتعب والارهاق ليما يرد البيت ... وهذي القوانين وضعية غالبا ... يعني الانسان حطها لأن النوم بالسوق مو عملية مستحيلة لكنها تؤدي لنتائج تنعكس على الشخص بشكل سلبي ... شلون ؟؟؟ يعني اذا نام بالسوق راح اتيي الشرطة وتاخذة وتحقق معاه او راح ينباق ... وممكن يكون موضع شبهه او نقد كبير وسخرية ... هذي امور البشر اغلبهم يعرفونها زين ... قيسي عليها االامور المتعلقة بالتعامل بين البشر ... في منظومة او مجموعة اسس في التعامل بين البشر محددة حسب الثقافة والمجتمع ... ما نقدر نتجاوزها وإلا فهمونا غلط ... وممكن يعصبون علينا الناس اللي نتعامل وياهم ... ويقول المثل الملائم للغرض اللي ابي اوصله لج ( إن كنت في روما فافعل كما يفعل الرومان ) طبعا من ناحية احترام عاداتهم بعدم التعدي عليها ... يمكن في ناس عايشين في مجتمع معين طول عمرهم بس يكرهون عاداته ... الواجب مسايرة المجتمع والاشخاص اللي فيه لأن بدون المسايرة راح يصير طق مطاقق واللي يحب السلام راح يكون اهو الضحية لو ما ساير المجتمع ... اللي يحب السلام والاجواء الودية لازم يحترم افكار المجتمع حتى لو تعارضت مع افكاره ... من ناحية ثانية لازم يكون عنده استقلاليته الفكرية الخاصة ورسالته الخاصة في الحياة اللي يحاول ينشرها بدون اي ازعاج اواثارة لمخاوف المجتمع وافراده ... يعني المقصود بعبارة ( كيفية تجنب الشخص بعض طبائعه السلبية التأثير وابدالها بأخرى اكثر ملائمة للوسط الذي يعيش فيه وللأشخاص الذين يتعامل معهم ) القدرة على عدم اثارة غضب او مخاوف افراد المجتمع من افكار الشخص او سلوكه سواء اضطر لإخفاء هويته تماما او جزء منها إلى ان تحين الفرصة او الفرص اللي ممكن ان يعبر فيها عن نفسه بكل صراحة ... واحيانا يكون الانسان مع صديق عمره في منتهى الصراحة ويكون مع اهله في منتهى الدبلوماسية والتكتم ... وهذا شائع في الدول المحافظة نتيجة للخوف من الظهور بصورة محط انتقاد او عقاب ... اما لما تبين تطبقين هالعبارة على نفسج فلازم تحددين مثلا موضوع انت مختلفة فيه مع اخوج الكبير مثلا ... وتحددين سلوكج معاه وقت طرح الموضوع في الماضي وسلوكج اللي لازم يصير في المستقبل ... مثال ... ( عدنان مثلا ) عنده عم دايما ينصحه ويحاول يتدخل في حياته ويقنعه قصب بأفكاره ... يقوم عدنان يسايره بالكلام مثل ... كلامك عالعين وعالراس ... يعطيك العافية على النصايح ... من عيني هاذي قبل هاذي ... وبعد ما يروح مع نفسه يكون عارف شنو اهو يبي بالضبط مو شنو يبي عمه ... وهكذا المسايرة ... بس لازم ما يبين الواحد انه متفق بالراي مع شخص اهو بالصج مختلف عنه ... لان هالشي راح يأثر على استقلاليته وراح يحس بالقيد لانه راح يضطر ينافق ويتصنع تصرفات تعجب عمه وما تعجبه ... لازم المسايرة تكون بالكلام الحلو ... هز الراس مثلا باحترام جدام اللي يتكلم ... يعني انا اسمعك ... الشكر واظهار الود ... من غير ما يبين الواحد انه متفق بالفكرة نفسها ... الا اذا سألج اخوج مثلا سؤال صريح ... انت توافقيني الراي ولا لأ ... فإما تقولين ( ما ادري ما فكرت بالموضوع بدقة ) او ( انا احترم رايك بس لي وجهة نظر مختلفة نوعا ما ) يعني الواحد بشكل او بآخر يحافظ على استقلاليته وبنفس الوقت يظهر كامل التقدير والاحترام لفكر الاخرين ... واذا كنت فعلا مستقلة فلا يهمج اذا عرفوا رايج الحقيقي او ظل مستتر ... اما اذا سألوج عن رايج فعبري عن اختلافج مع التقدير والاحترام لفكرهم واخذي المسألة كلها برحابة صدر وهدوء وابتسامة عشان تنعكس نفسيتج على اللي جدامج وبالتالي ما يحتد ولايشتد ولا يحس ان الاختلاف يسبب توتر وحدة بينكم ... واخيرا ... ( بشري عن حياتج شصار معاج ؟ ) واتمنى اسمع عنج اكثر ...