بتسال عن الأشعار ؟
خليتنى والله احتار
اوصف لك جمال ليلى
والا بديع النهار ؟
******
حتقول لى : احكى ماتخبيش
فضفض باللى فى بالك ؛ ماتداريش
احنا هنا اخوه ؛ واصحاب
وزى مودتنا دى ماتلاقيش
******
أقول واحكى عن رمضان
اللى عبيره عطَّر المكان
جاى وجايب خيراته
تقوى ؛ وهدى ؛ وايمان
*******
المساجد بتستعد من اسابيع
بأنوار زى زهور الربيع
وميكرفونات ؛ وسماعات عاليه
تخللى ليلنا ( بالقرآن ) بديع
*******
والأسواق بالبضايع مليانه
إشى محلى ؛ وإشى مستورد جانا
والكل بيجيب ويستبضع
حتى اخونا ؛ ابو جيوب فقرانه
*****
موسم ؛ ويعود للجميع بخير
ونخرج منه بقلوب زى الطير
خفيفه ؛ تسبَّح بحمد المولى
وماتشيل إلا كل ود للغير