|
ارجو من الجميع قراءة قصتي .
بسم الله الرحمن الرحيم
السلام عليكم ورحمه الله وبركاته
في البداية احب اوضح ان هذه اول مشاركة لي والحقيقة اني ترددت قبل التسجيل في المنتدى لعدم رغبتي ان اشعر اني مريض او ما شابه عموما في لحظة قررت اني اسجل بهالمنتدى وقررت ان اطرح قصتي على الاقل افضفض عن نفسي .
انا الان شاب عمري 25 سنة اعمل مدرس انا الان ينظري الاهل كرجل عاقل وينظرلي الناس من حولي بنوع من الغبطة على ما انعم الله به علي .
قصتي :
ان ولدت لام حنونة طيبة وابوي متزوج كذا زوجة . من يوم عرفت نفسي في سن السابعة وانا دايم اسمع امي واخواني الاشقاء ( من امي وابوي ) دايم يتكلمون عن ظلم ابويه وان مقصر وبخيل ( ابوي رجل غني وهو بخيل نوعا ما ) الاهم ان ابوي يظلم امي ويميز زوجاته الاخريات عن امي بالمصروف وغيره لدرجة ان اللي يصرف علينا هم اخواني الكبار ( انا اخر العنقود عند الوالدة ) الوالد اذا طلبته فلوس يعطيني لكن بعد احراجات لدرجة اني مرة طلبته ريالين ( وقتها كنت صغير ) وكان معاه رجال قام ابوي واعطاني خمسة ريال انا استغربت لكن في نفس الوقت عرفت انه مظاهر قدام الناس ( عشان محد يقول عنه بخيل ) الاهم رحت البقالة وشريت بريالين ورجعت له واعطيته الثلاث ريال وقالي خلها معاك قلت لا . واخذها . اللي ابي اقوله ان ابوي بخيل لكن الغريبة ان يحب العزايم يعني عادي لو يجي ضيوف تلاقونه يكرمهم يذبح ويصلخ الاهم محد يقول عنه بخيل .
في المرحلة الابتدائية كنت ممتاز في دروسي واهتم بدروسي فقط رغم المشاكل اللي كانت بين اخواني الاشقاء الكبار مع ابوي . حتى اذكر يوم ابوي سأل امي عني قال هو سنة كم جلست امي تضحك وعلمته .
الاهم خلصت الابتدائي وكانت حياتي حلوة فيها طفل عشت البراءة على اصولها .
ودخلت المرحلة المتوسط ونجحت بتقدير ممتاز وكانت هذه اخر سنة انجح بامتياز . السبب بتعرفونه .
في ثاني متوسط حبيت اني احس برجولتي ووقتها بلغت لاني دخلت المدرسة وعمري 8 سنوات لان ابوي اخرني سنة بالبيت لاعتقاده اني صغير او ماشابه . الاهم في ثاني متوسط ابي احس اني رجال تعلمت الدخان انا واحد اخواني من ام ثانية وهو يصغرني بسنة لكنه معي بثاني متوسط الاهم صرت ادخن وانا كنت ولا زلت ضعيف البنية ( نحيف ) الاهم كنت ادخن بشراسة . واهمل بدروسي بس الاهم اني نجحت بدروسي بتقدير جيد وانتقلت لثالث متوسط ( في ثالث متوسط بديت اشرد من المدرسة وادخن واتمشكل مع الطلاب والمدرسين وكنت ( احب ولد ) لكني كنت اخجل منه ووجدت صعوبه بالتعرف عليه وكانت نيتي معه زينه ( اللي ابيه منه نكون اصدقاء بس ) لكن هو ما عطاني فرصة وزاد حبه في قلبي لدرجة اني كنت اجلس في الشارع اللي عند بيتهم استناه وكنت اخرج من بيتنا واجلس في حارتهم بعض الاحيان لحد الساعة 3 في الليل .
لكن مع الوقت نسيته او تناسيته .
في ثالث متوسط تعبت امي بمرض خطير وكثرت عندنا المشاكل وصرت اتضارب مع اخواني حتى اشقائي الكبار واحد منهم تزاعلنا انا وياه وجلسنا اكثر من سنتين ما نتكلم مع بعض وامي بعد كذا انعم الله عليها بالشفاء .
في ثالث متوسط بدت مشاكلي مع ابوي من ناحية دخان والتفريك من المدرسة وكان يضربني وانا كنت اخاف منه . ويوم ( تفل علي في الشارع قدام الناس والعالم اللي بسياراتهم يهدون ويناظروني ويبتسمون )
في يوم انفجرت وقت ما ابوي ضربني الاهم بديت اتكلم بعصبية وارد عليه الكلام لكن ما سبيته لا سمح الله ( يبقى ابوي )
ومرة ايضا تناقشت معاه باسلوب مختلف وذكرت له انه ظالم وما يخاف الله وانه مقصر علينا وظالم امي .
اولى ثانوي نفس ثالث متوسط من ناحية خروجي خارج البيت والدخان والحب اللي قطع قلبي .
في اول ثانوي بدت عندي مشكلة هي اني من كثر ما صرت ادخن صارت رجولي فيها بلى وصرت اتراخى بمشيتي العالم اللي في المدرسة كانوا يقولون حشاش والعالم اللي في الشارع يقولون مسوي مشكله والصدق لا هذي ولا ذي .
بدت المواقف تكثر علي والسبة مشيتي اللي تغيرت وصرت اخاف امشي قدام الناس وفي ثاني ثانوي اعتزلت الناس بسبة خوفي من تعليقاتهم والاهل كانو يحسبوني عقلت .
الاهم في ثاني ثانوي شديت حيلي في الدراسة بسبة العزلة اللي انا فرضتها على نفسي ونجحت بتقدير جيد جدا ( واخوي الغير شقيق رسب وعاد سنة ) من هذي اللحظة بدت العالم تتغير معي وبديت احس ان ابوي يغار مني لانه يحب اخوي الغير شقيق اكثر وكانو يقولون مسيرك للعسكرية لكن في ثالث ثانوي اجتهدت اكثر ونجحت بنسبة 89 ودخلت الجامعة .
في اول سنة بالجامعة ما كان عندي سيارة رغم ان ابوي بطران لكن بسبب الاحراجات اللي تجيه من الناس قام واعطاني سيارة عادية تفشل ما تليق بيه . لكن تحملت وكنت ما اطيق اسوقها واذا وقفت عند الجامعة اوقف بعيد عشان الطلاب ما يعلقون او يستصغروني او ما شابه لان الطلاب كانوا يستعرضون بسياراتهم .
في اول سنة رسبت بمادة والمواد الاخرى نجحت بمقبول ومعدل سي .
لكن في السنة الثانية شديت حيلي وقدرت ارفع المعدل وظلت مشاكلي من رهاب وخوف من الناس مشكلة المشي قدام الناس بدت تتأزم معي لكن كنت اتغلب عليها في الجامعة مع اخوياي لاني احاول اضحك وانكت وكنت فرفوش معهم .
هكذا مرت سنوات الجامعة وتخرجت بتقدير جيد ومعدل قريب من الجيد جدا والحمد لله على كل حال مابي اقول لو شديت كان جبت اكثر لكن كله خير من الله .
وبعد كذا توظفت وانا الحين مدرس . مشاكلي الحالية ابقولها لكم . واللي يقدر يفيدني لا يبخل .
انا الان تغلبت بشكل بسيط على المشي فصرت امشي بثقة وبدون خوف ولله الحمد .
انا الان احسني غريب من ناحية اني اذا مشيت في الشارع او مكان عام احس الناس كلها تناظرني .
انا الان ما اروح اسواق واماكن عامه لجهلي باغلبها .وانحرج اذا احد قال تعرف الشي الفلاني والسوق الفلاني صعبة اقوله ما اعرف وماعمري رحتها لاني منعزل عن الناس .
انا الحين احب اغاني الحزن واسمعها من يوم انا بثاني متوسط واغاني محددة اكررها في كل يوم عشرات المرات طوال هذي السنين .
لدي مشكلة اكبر هي ( اخواني اللي اصغر مني تزوجوا واللي خاطب واخوي الغير شقيق اصبح لديه ولد ) الوالدة تزن علي بالزواج واخواتي يدورون لي ويقولون ما بقى الا نزوجك .
وانا اقول بدري .
تدورون وش اللي مخوفني .
اخاف ان تزوجت ما اسعد الانسانة اللي بتزوجها واخاف تكون حزينة معي , لاني ما اقدر اطلعها وامشيها وغير كذا .
والخوف الاكبر اذا بقيت عزوبي اخاف الناس يقولون علامه ما هو رجال والا وش فيه .
ارجوا قراءة قصتي بتمعن .
كلي امل في الله ثم فيكم .
لقب اكبر حزن اطلقته على نفسي بثاني متوسط ولا زلت اردده .
|