نفساني - عرض مشاركة واحدة - ~|| غرفه خــاصـ للمكتئبين ـه ||~

28-04-2008, 10:16 PM

اكتئاب ؟؟
مشكلتي اني اعاني من الاكتئاب من فترة طوييييلة ... مريت بتجربة حب قديمة صار لها ثلاث سنين و الى الآن متعلقة بالشخص اللي أحبه .. أدري انه تزوج .. أدري اني لازم أنساه لكني مو قادرة أنساه .. من فترةوصلت لحالة اكتئاب شديد لدرجة اني ما كنت أطلع من غرفتي و ما آكل أو اذا كليت (أتقيأ ) الأكل كله .. وصلت فيني حالة الاكتئاب اني كنت أجرح نفسي بموس أو أي شي حاد بس لأني أكره نفسي ..
صرت ما احب الناس و كثيرة البكاء حتى من دون سبب .. عمري 23 سنة و المفروض البنت في هذا السن تكون في قمة الحيوية و النشاظ لكني عكس هذا ...
صرت كسولة و خاملة و ما احب أسوي أي شي اجتماعي مثل حضور الحفلات أو الزيارات العائلية ... الخ ..
لما توظفت و بديت حياتي المهنية ...
كنت شبه منهارة .. لكنني شفت الانسان اللي أحبه ..
باختصار حب من طرف واحد .. معجبة فيه .. أخلاقه عالية .. أسلوبه في الكلام مهذب .. شاب مثل سني لكنه تفكيره و أخلاقه قمة في الأدب ..
تعلقت فيه حيييييييل و تمنيت انه يكون هذا الانسان اللي راح يسعدني ..
مرات أحس انه في شي بينا .. نظرات .. ابتسامة .. مرات تصير مواقف تبين انه هذا الانسان يبيني أو معجب فيني ..
المشكلة أنا عشت في الخيال .. و تخيلت انه يحبني ..
و المشكلة الأكبر انه كئابتي اختفت بسبب الانسان هذا و صرت أشوف الدنيا مرة ثانية حلوة .. صرت أبتسم و اضحك و طول وقتي سعيده .. لأني التقيت بهذا الشاب الخلوق .. مع اني أحبه و ما ادري ان كان يحبني أو لا ..
اكتشفت من شهر انه خاطب .. ما ادري ان كان صح أو لا .. لأنه قالي ما صار شي رسمي و انه عايش قصة حب و ان شاء الله عقب فترة راح يتزوج ..
احبطت .. و رجعت مرة ثانية كئيبة .. أكثر من السابق ..
آنا أقول هذا الكلام و قصتي مستمرة و ما ادري شنو أسوي .. ما ادري شنو يكون موقفي لما اكتشف انه تزوج ... لما افكر انه راح يتزوج أقعد ابجي ابجي .. أظل طول اليوم بغرفتي أتكلم مع نفسي .. مرات اتمنى اني اموت عشان ما احس بالكئابة ..
ما ادري شنو الحل .. اشلون راح أواجه الحقيقة المرة .. انه حب من طرف واحد .. اشلون اقنع نفسي اني لازم اطلع من حالة الكئابة و اركز تفكيري كله على وظيفتي .. خصوصا وظيفتي حساسة و ادارية .. هذا الانسان أشوفه كل يوم معاي بالداوم .. اشلون اواجهه ؟؟؟
حياتي كلها كئابة من سبب و من دون سبب .. منعزلة اجتماعيا .. اكره اللي حولي .. و من شهرين تقريبا رجعت حالة الاكتئاب مرة ثانية .. و من أسبوع رجعت فيني عادة تقيؤ الأكل .. مرات أتمنى اني اطلع من الحالة اللي فيني .. ومرات العكس .. المشكلة .. و لا أحد من اللي حولي .. صديقاتي أو عائلتي أو أمي أو أبوي .. و لا أحد يدري انه فيني هذي الحالة .. وصاروا متعودين علي اني أقعد بغرفتي طول اليوم و ما اطلع من البيت ..