|
أدوية لفترات القلق المؤقتة ..
السلام عليكم ورحمة الله وبركاته ..
أولآ أنا متابع المنتدي من فترة طويلة ، وبفضل الله كان في كثير من الوقت بيكون وسيلة إطمئنان ليا إن الدوا موجود كحل لو سائت الأحوال ، وبصراحة رؤيتي لمشاركات بعض الأعضاء الإيجابيين ومحبين الخير لغيرهم كانت أكبر داعم نفسي ليا الفترة إلي فاتت ..
حابب أسأل أهل الخبرة لعلي أجد غايتي هنا ، وسأكون شاكر وممتن لأبعد الحدود لمن يساعد ..
من سنه تقريبآ مريت بتجربة عاطفية وانتهت بشكل أحزنني ولاني شخصية حساسة جدآ ، كنت بحاول التناسي بعدة أشكال وفعلا حسيت إني إتناسيت وإن كنت فضلت حاسس بحزن خفيف ..
وبعدها بعدة أشهر ..
أصبت بحالة من القلق الحاد والساوس والأفكار المتسلطة بطريقة عمري ما مريت بيها في حياتي ،
كنت بتنقل من فكرة لفكرة ومن وسواس ل وسواس ومبقدرش أبطل تفكير ، وصداع وتوتر من أشياء تافهه ورهاب إجتماعي وقلق وإكتئاب ..
الغريب إني كنت طول حياتي بمر بنوبات خفيفه زي قلق لكن كنت بتعامل بإيجابية وبتعدي .. لكن المرة دي كانت أصعب من أي مرة ..
المهم حاولت أعالج وأواجة وأتجاهل وقربت لربنا واستخدمت كل التقنيات ، والحمد لله لا أنكر حصل تقدم كبير جدآ ، سيطرت ع الوساوس الي حد كبير ، قدرت أتعامل مع القلق ، إلي لسه بحس بيه ولكن قادر أتعايش ..
ولما لقيت إن حالتي اتوقفت عند المرحلة دي قررت أروح لطبيب نفسي والتاني ، وإلي شخصوني باضطراب قلق عام ..
وواحد كتب لي باروكسيتين وواحد تاني قولتله اني خايف من الاعراض الجانبية للباروكسيتين ف كتب لي سببراليكس ..
ولحقيقة إن أنا مش مكتئب وفي لحظات بقدر أكون فيها في حالة جيدة , أنا خايف أتعالج بمضاد إكتئاب أتورط فيه وأفضل فيه طول عمري ..
أنا قلت عندي الدافعية والاستمتاع بالحياة وفي افكار من المستقبل متقبلها وبحاول أتجاهلها لكن حالة القلق مسببالي عسر مزاج واضح ..
هل في أي علاج للقلق ممكن يتاخد لفترة بسيطة أو مؤقتة وأعراضة الجانبية او الانسحابية أقل من أدوية مضادات الاكتئاب ؟
أنا في مرحلة محتاج فيها آخد خطوات جدية في حياتي في الزواج والعمل ومحتاج فقط بعض الهدوء والدافع ومزاج جيد وترتيب أفكاري ،
ف لو في أي حد يقدر يفيدني بدواء بسيط لفترة مؤقتة هكون شاكر وممتن ليه لآخر يوم في عمري ..
ولو حد عنده فكرة عن دواء نوديبرين ياريت يفيدني ..
والسلام عليكم ورحمة الله وبركاته ..
|