نفساني - عرض مشاركة واحدة

13-11-2020, 02:05 PM

السلام عليكم ورحمة الله وبركاته

انا عضوه يديده عندكم من الامارات ..بس كانت عندي صلاحيه اشارك..إلا ألحين صدق فرحت انهم عطوني فرصه أشارككم همومكم وتشاركوني همي

انا دخلت في حالة ألاكتئاب حاد من شهر إبريل تقريبا مع حالات بس بطريقه خفيفه ..وهذا لسبب ضغوطات عاليه مريت فيها ..بس بعدها كانت نوبات الهلع دخلت في حياتي وما كنت أعرف شو السبب..الا هو أفكار عن الموت وخوف وتوتر وحالة الترجيع وانتفاخ البطن وسد الشهيه وحزن وبكاء من غير سبب صرت حساسه واااايد بان التعب في ويهي ..لمن قررت أتعالج عن الشيخ ..تعالجت عنده تقريبا شهر او شهر ونص بس لا فائده بعدها زادت في حالتي صار شبه يومي..احس اني بموت واحس ببرودة الاطراف والرجفه وخوف وهلع وحزن ..

بس بعدها بديت أقرا عن أعراض إكتئاب قست حالتي ان ممكن حالتي يقال عنها أكتئاب حاد ..

فجأه بتاريخ 25/9/2020 قررت ازور طبيب نفسي بعياده خاصه وسرت له شرت له حالتي وانا أصيح ..طبعا كانت هاي اول مره ازور فيها طبيب نفسي لحالتي ..الدكتور خلاني اتكلم اقول كله لي عندي بعدها وصف لس دواء اسمه برنتلكس 10mg قالي خذيه لمدة اسبوعين وخليني اشوفج بعدها ..إبدي بنص حبه لمدة 4 ايام بعدها خذي حبه كامله ..

كنت متوتره وخايفه من الحبه ختها وأنا أناجي رب العالمين وأسأله الشفاء ....بس قبل لا اخذه بحثت عن تجارب هاي للحبوب ولقيت في وااايد تجارب ماشاء الله بصراحه حسيت انكم من عايله وحده وإخوان

لان الكل يعاني من نفس المعاناه بس الفرق في حد شديد وفي حد أقل ..وانا سعيده بوجودي معاكم ..أتمنى أخوي هشام الهشام يقرأ موضوعي لاني أحب ردوده لكم تحياتي له ..

خذت أول حبه ثاني يوم حسيت ان أفكار السلبيه و تطلع من القلب بس مو قادره توصل للمخ حسيت بمخي متخدر مو قادر يعطي اي تجاوب للافكار السلبيه ..

حسيت نفسي اللهم لك الحمد والشكر اني تحسنت نوعا ما ..قمت أرجع حق حالتي الطبيعيه بس مو 100%100 لان كانت الافكار والاحساس ييني بس مو بهاايج القوه عرفتو؟؟

بعد اسبوعين رحت الموعد وسالني الدكتور عن نسبة التحسن فقلته الحمدالله تحسنت حالتي تقريبا فوق 50% واقل عن 70% بعدها وصف لي برنتلكس بس ب20mg ..قال حق اسبوعين ..خذت علاج 20 mg حسيت بتحسن بطئي شوي بس كثر ما اقرأ ألاخ هشام الهشام ..إن الواحد مفروض ما يستعجل ويعطي الدواء حقه فعطيته حق لمده اسبوعين..

حسيت بتحسن تقريبا 70 % ..بعدها سرت موعدي الثالث شررحت له النسبه فقالي استمري على الحبوب نفسه بنفس الجرعه لمدة شهر ..
وانا الحمدالله ماشيه بالعلاج ..أمس كملت 49 يوم وكان عندي موعد عند دكتور طبعا غيرت العياده من الخاص للحكومه فزرت دكتور أمس وشرت له حالتي وقلت بكمل علاجي بالحكومه والحمدالله ..سألني عن الاعراض ونسبة التحسن وعن الادويه ..رد كتب لي نفس الحبوب لمدة شهر اكثر مع اني بغيت اقوله يزيد لي الجرعه بس قلت ما بستعجل ..

بس امس بالليل لمن كنت برع بروحي سمعت صوت مادري ما كنت منتبه للصوت عدل المهم حسيت ب خوف و الهلع فظييييييييع حسيت راسي داير وريولي مو شايلتتني ذكرت ان الاخ هشام قال لا تنفردون حزة النوبه ..فشليت عمري بسرعه ورجعت البيت لان برع كنت بروحي والمكان مافي حد غير اصحاب محلات ربع ساعه تقريبا وهديت اللهم لك الحمد بس أثره فيني لمن ألحين بس بإكتئاب وافكار وخوف

مادري هل ممكن من تأثير أمس؟؟
لان الحمدالله من فتره ما يتني نوبه قويه جذي بس اللهم لك الحمد ربع ساعه واختفت

بالاخير بقولكم أحبكم جميعا في الله

إختكم حور من الامارات ..واتمنى تقبلوني في اسرتكم كإخت خفيفه عليكم

سمير ساهران معجب بهذا

المصدر: نفساني