نفساني - عرض مشاركة واحدة

28-09-2018, 10:13 AM

الله يسعد قلبك يابو نجلا
طريق جوده يذكرني اذا رحت الرياض ماداني الخطوط الطويله بس اني احب المحطات اوقف بكل محطه اشتري حب وبساكيت وحلاو وشاهي وما اوصل الرياض الا بطني منتفخ ولايعه كبدي .. حلو الطريق بالشتاء .
ماشاء الله عليك شحن العقل بالكلمات الايجابيه له مردود رائع على الجسم في البدايه ماتلاحظ شي بس بعدين مع الوقت تلاقي نفسك تغيرت كثير .
بقولك شي حصل معاي ايام الهلع السنه اللي فاتت وقبل الهلع يجيني كثير خفقان بالقلب واقول قلة نوم او ارهاق وطبعا بعد ماجاني الاضطراب النفسي زاد الخفقان وضغطي جول الوقت مرتفع وكنت اقول انا متأكده ان فيني شي بالقلب المهم بد ما اخذت برنتلكس اللي لاحظته ان القلب هجد ووقفت كونكور والضغط انتظم سبحان الله ماشاء الله .
الاكيد ان المخ والنفسيه تلخبط كل وظائف الجسم وتعفسه فوق تحت والمضحك ان كل هذا دارسته بس يوم جت الحاله علي انا ضيعت كل اللي درسته وصرت اوسوس .
المخ اعقد واعظم واكبر معجزات الله سبحانه ان زان زانت الدنيا كلها صحتك نفسيتك اداءك بالحياه وان شان العقل شانت الدنيا باللي فيها .
الله يكتب لنا ولك السعاده وراحة البال والمخ المتعافي يارب .
انا احس ان البرنتلكس كان احسن قرار اخذته بحياتي بصراحه صايره مع الدواء لو تجيني دوخه او ضيقه اطنش بجد بدون خوف ولا قلق .
ابو نجلا ابيك تقرا كتاب او تشوف يوتيوب عن المرحله الملكيه شي عجيب .
بعطيك اختصار للموضوع المرحله الملكيه اذا وصلتها بحياتك زانت كل الحياه بعينك اولها تحب نفسك وتدلعها وثانيها تطنش الناس وكلامهم وارائهم فيك يعني اخر همك الناس واذا وصلت لهالمرحله بقناعه راح تتغير حياتك كثير انا تقريبا وصلت لثلاث ارباع الطريق .
انا حقيقة لايهمني الناس ولا المظاهر ولا ابكي على ماضي ولا اتحسر على شي فقدته ولاني ندمانه اني ماتزوجت بالعكس قاعده الاحظ حكمه بكل شي ماصار لي بحياتي وكنت اتمناه.. مثلا انا وحده ماحب اي قيود او احد يحكمني ابدا واتخيل لو تزوجت بعل قلب الرجال وبيعل قلبي ولاحظت نفسي انزعج من البزران العب معهم شوي بعدين ودي اصفقهم ولا اخب الارتباط والتقيد بوقت للنوم او الصحيه و و و اشياء كثيره حمدت ربي وعرفت حكمته انه منعها عني .
وصدقني وطيعني ان الله مامنع عنك شي الا فيه خيره لك وماتدري انت توك بعز شبابك يمكن ربي مأجل لك الخير بعمة الحريم ويمكن ربي يرتب لك حياتك الان وانت ماتدري .. دائما تأكد ان الخيره جايتك بالطريق .
و اولا واخيرا المكتوب لازم نشوفه .
انا ادري ان وقت النوبه شي صعب بالذات مع الافكار الانتحاريه لكن انت قوي وذكي جدا وتحب الحياه وراح تعدي بحول الله ثم الدواء .
سألت الدكتور عن الافكار الانتحاريه قال المكتئبين نوعين نوع يحب الحياه لكن مايستمتع بأي شي بسبب الاكتئاب و نوع يكره الحياه جدا النوع الاول ماينتحر ابدا لأنه يشعر انه فيه اشياء لسا ماسواها وماحصل عليها ولسا يبي يستمتع واصلا يخاف من الموت واللي يشعر فيه وقت النوبه مجرد افكار لكنها ترعبه فكرة الانتحار .
الخوف على النوع الثاني اللي اصلا انقطعت كل صله له بالحياه يكره نفسه يكره الناس يكره شكله ويكره اهله وماعنده امل بشي ابد .
الا صحيح بشرنا عن ركبتك شلونها عساك اشوا ؟

أبو نجلا معجب بهذا