نفساني - عرض مشاركة واحدة

16-06-2015, 08:28 AM

انا احب هذا الموقع بشكل لا يمكن وصفه جزاه الله كل الخير من انشأه كان صديقي اثناء مرحلة الهلع و كنت بهدي كتير لما بقرا عن معاناة الاخارين الله يشفينا واياهم كنت اشاهد فقط مشاركتكم منذ بداية مرضي الان هذه اول مشاركة ليا حبيت احكي عن ملخص معاناتي مع المرض والعلاج اللي استمر اكثر من سنة واحكي لكم عن معاناتي الان....
انا شاب عمره 19 سنة في المستوي الاول في الكلية الان، بدات معاناتي من حوالي سنة و شهر بالظبط كنت وقتها في الثانوية العامة وتحت ضغوطات فظيعة ما بين مذاكرة وامتحانات و فجاة في يوم من الايام جاتني النوبة و رايت ايام ما يعلم بيها الا ربنا عذاب ما بعده عذاب و بعد ما كنت طالب كويس و بذاكر و كانت طموحي عالية و نفسي اوصل لحاجة كل ده اتدمر في ثانية واحدة بس.
كان ساعتها فاضل علي الامتحانات النهائية شهر و لما جاتني الحالة توقفت عن المذاكرة تماماً لحد ما خلصت الامتحانات بسبب التعب والاعراض البشعة اللي كانت كالاتي [ضربات قلب سريعة جدا، شعور باقتراب الموت والخوف الشديد منه، شعور بالضيق والاكتئاب واحساس ان الحياة لا معني لها ولا طعم، الم شديد في قلبي، ارق بشع وصل لعدم القدرة علي النوم و نوبات فزع عند الدخول في النوم تيقظني، كوابيس شديدة، تذكر من ماتوا من الفنانين والعائلة والمعارف والبحث عن سبب موتهم و اين هم الان وماذا يفعلون ويشعرون، تخيل الحياة بعد موتي، وساوس اني مصاب بامراض وتخيل ان اعراضها لدي واكثرهم وسواس مرض القلب وتخيل ان سبب موتي سيكون منه بازمة قلبية، اصبحت اكره النوم] وضاع مستقبلي لانه طبعا مجموعي جاء ضعيف و الهلع السبب في كل ده. #الهلع غير مجري حياتي كلها 360 درجة#
ولفيت علي اطباء البلد كلها و الكل يقول لي دي بسبب الامتحانات واول ما تنتهي الامتحانات هتنتهي معاها و مع الاسف استحملت و لم تنتهي وعيشت في دوامة ما بين وساوس بالموت علي نوبات متقطعة كانت تجعلني انزل اروح طوارئ المستشفيات في ليالي العيد (الناس تحتفل في الشوارع وانا احتفل في طوارئ المستشفيات) اللهم لا اعتراض.
خلال الفترة العذاب دي انا عملت كل انواع التحاليل والاشعات بما فيهم الايكو كررته مرتين مرة كان سليم و ده كنت عملته اول ما جاتني النوبات و التاني عملته بعديها ب ثلاثة أشهر وده ظهر فيه ارتخاء في الصمام الميترالي مع ارتجاع بسيط والدكتور قال مش مشكلة و ده شئ بسيط و غير مؤثر وعند كل الناس
دخلت في رحلة مع العلاج النفسي بداتها بعد شهرين او ثلاثة من بداية اول نوبة رحت لدكتورين واحد كان بيديني ادوية تتعبني اكتر ما بتفدني منهم واحد اسمه paroxtein اعتقد ده اسمه كان من نوع السايروكسات الدوا هلكني من اعراضه غيرت الدكتور و رحت لدكتور تاني اعطاني ادوية كانت مريحة جدا جدا بدا معايا بدواء Statomain و ده بداته معه بالتدريج ثم اضاف عليه Lamectal بعدها ب ثلاثة أشهر تقريبا ومشيت معاه بانتظام عالعلاج و ارتحت و شفيت تماما ولكن،،،
الان انا قللت جرعة Statomain حسب تعليماته ثم اوقفته و كل هذا تحت تعليماته حرفياً واستمريت علي قرص واحد من Lamectal و هو الدواء اللي باخد فقط الان.
مشكلتي الكبري اني اثناء فترة العلاج ظهر عليا عرض غريب جدا لم اكن اعاني منه؛
وهو شعور بصدمات كهربائية قوية تضرب جسمي كله و راسي حتي اطرافي كشعور التنميل الكلام ده حتي قبل اضافة Lamectal
وكل اما اشتكي للدكتور يقول لي "عادي كبر دماغك مفيش حاجة" وبالفعل لم اعطي اهتمام خالص للموضوع ده وظل مستمر معي حتي الان وهو يتعبني جدا والغريب انه ازداد بعدما بطلت Statomain والاغرب انه ظهر اثناء ما كنت باخده برضو!!!!!!! يعني لا كدة نافع ولا كدة نافع.
ومن خلال ملاحظلتي لاحظت ان صدمات الكهربا اللي بتضرب جسمي و راسي لمدة لحظة دي بتزيد وقت اقتراب موعد الجرعة!! كلام متناقد مع بعضه و ده اللي هيجنني.
ايه السبب!! يعني الدواء اما كنت باخده ظهر عليا الاعراض دي لاول مرة ولما بطلته ظهرت و زادت!!
الان انا بنائاً تلي تعليماته اوقفت Statomain ومستمر علي Lamectal لكن للاسف الوسواس بدا يرجع تاني ؛ الوسواس اللي دمر لي حياتي و ضيع مستقبلي في اهم سنة في حياتي (وسواس الموت) علي طول احس اني هموت واحس اني مهما عملت نهايتي الموت اللي انا بخاف خوف فظيع ومريع منه ومن تخيله وتخيل حال الموتي و بماذا شعروا اثناء سكرات الموت و بماذا يشعرون الان و اخاف خوف شديد لا يمكن وضفه او مقاومته وللاسف ظهر تاني بعد ما حسيت اني انتهيت من كابوس الهلع و الوساوس.
الحمدلله على كل حال انا راضي بكل شيء كتبه ربنا ليا ومش معترض علي اي حاجة وعسي ان يجعل الله هذه المعاناة في ميزان حسناتنا جميعاً جميعاً.
لكن الان ما يتعبني هو رجوع وساوس والخوف من الموت و شعور الكهربا اللي بتضرب جسمي و راسي كصدمات كهرباء وتنميل معها في الاطراف واصبحت اكره النوم واخاف منه.

المصدر: نفساني