لعل الله يحدث بعد ذلك امرا......🤲🏻💭
 

السلام عليكم ورحمة الله ..
هالمره مو جايه اشكي لكم كعادتي ...اكتب لكم وانا ابكي واطلع من الصفحه وانا مرتاحه من كلامكم نعم الاخوان ....لكن هالمره ابغى افضفض
مشتته فعلاً انا لو تشوفوني في حياتي ماتصدقون اني انا اللي اراسلكم
متصنعه في كل شي مابغى اتعب اللي يحبوني ويشيلون همي ولا ابغى انكسر قدام بناتي عندي بنتين صغار مالهم ذنب في تعبي ....اطلع اتمشى واطلع اتسوق علشانهم وانا من داخل اموت الف موته اجامل امي وابوي واضحك واسولف وانا مو مستوعبه شي تمر مناسبات واجامل وافرح وانا (كذابــه)اقحم نفسي في الحياه وهيه ماتبغاني ....مجرد اختلي بنفسي او اروح فراشي ابكي حتى انام ...ياليت الناس يعرفون كم اجاهد نفسي وكم افحم نفسي علشان اكون طبيعيه بس من داخل ولاااااشي

يارب في هذا اليوم الفضيل تجعل لنا فرجا ومخرجا 💭

يارحمن يارحيم اشفنا واشف كل مريض ياشافي نسألك ببركة هذا اليوم العظيم والمبارك ان تستجيب دعاءنا ومناجاتنا فلا ملجأ منك الا اليك ..

ما اصعب من انك تعبان وتكذب من اجل ان تجامل مريت بشعورك هذا اللهيشفيك ويعافيك وجميع من في الموقع

انتي مو كذابه ولا متصنعه انتي بطله و امرأه قويه احب المرأه القويه و اللي ترحم من حولها و تؤثرهم على نفسها انا احييك و اتمنى منك الا تنعتي نفسك بصفات لا تستحقها انتي تجاهدين فهنيئا لكي الاجر و الثواب عند الله مافي شي يضيع و لا يغفل الله عنك ربي يضاعف اجرك و يصلح لك الحال و يحفظ لك بناتك الحلوات و يقويك و يفرج همك و تفرحي داخليا و خارجيا حقيقي نادر القى امرأه في مثل قوتك حتى اسمك فيه قويه اللي مختارته يابخت والدينك و اسرتك فيك
كل ما جيتي تبكي تذكري الاجر و هذا التعب الداخلي جعل منك امراه قويه هدفها اسعاد من هم حولها و بتساير هالحياه امراه لا يهزمها هحزن و لا تعب و لا يكسرها لو على البكاء ابكي و تنفسي و اغسلي ما تكبتيه لكن ابغاك تكوني فخوره بنفسك و معتزه صراحه انا ابحث عن نساء فاضلات مثلك حولي في مجتمعي و عملي ما شاء الله تبارك الله عليك هذا من فضل ربك امدك بكل هذه القوه و العطاء تشرفت فيك اختي الفاضله.
كل عام انتي بخير يا ام الاميرات بكره بيطلعوا بناتك مثلك في الشموخ و الايجابيه و البر و بيسقوك حب و حنان و ربي بيجبر خاطرك فيهم و بهم بإذن الله .

اللهم امين
تحري الصدق ورح تكتشفين ان اللي كنت تظنينه مجرد اوهام لا وجود لها في الواقع ولا عند اكثر الناس
و الصدق اثره طيب على النفس واجره عظيم

الوالدين الاحسان لهم مقضي من الله و واجب
وان كان مجامله

غابت عني النقطه هذي

كتابة المواضيع ماتفيدك راجعي دكتور نفسي لانك مريضه بالاكتئاب السوداوي وبعدين وش دخل الناس يعرفون انك تجاهدين نفسك كل الناس عندهم مشاكل وهموم الله يرفع عنك

انا استغرب من مداخلاتك معظمها قاسية ولافيها مراعاة ودائما سلبية.. صدقني اخوي رعد انت الاكتئاب لاعب بك لعب لدرجة ان المشاعر عندك صفر

اخوي طه انت بس الي مستغرب وغيرك لا تدري ليش لانك انت الي عندك مشكله والا ردي مافيه قساوه ولا شي بالعكس ردي لمصلحتها وبالنسبه للمشاعر ابشرك فل

ايه عندي اكتئاب ووسواس ونوبات هلع الحمد لله على كل شي
واستخدم ادويه لكن لم يأذن ربي بشفائي والحمد لله
انا اللي خلاني اكتب ضعفت مع نفسي وانتو تعتبرون لي منفذ في حياتي استفيد منكم ومن كلامكم ودعواتكم
اعرف الناس مالهم دخل يعرفون اني اجاهد نفسي يكفيني ربي يعلم كيف عيشتي
اللي كنت احتاجه كلمتين طيبه تدفعني للامام وماقصرتو جميعاً

جزاكم الله الف خير على كل كلمه🌸

أنت شجاعة ماشاء الله عليك .. استمري في صمودك وأكسب المعركة مع المرض واكسبي كل شيء وفي مقدمة هذا الأجر العظيم بغير حساب
لله درك من امرأة وأيضا لله درك من امرأة وأيضا لله درك من امرأة شجاعة .

مع صمودك تجاهلي الفكرة السوداء واقرني كل لحظة من حياتك بذكر الله وتسبيحه ومع الأيام سوف تتلاشى وتنمسح من فكرك واعلمي ان نسيان الفكرة يحتاج مفعوله أسابيع ليبدأ بالعمل
بالضبط كمفعول مايسمى بالأدوية النفسية التي يتحدث عنها مايسمى بالأطباء النفسيين
ويقولون تحتاج لأسابيع كي يبدا مفعولها هذا إن بدأ أصلا .

طيب ليه انت تكتب مواضيع وردود وتتكلم عن نفسك الاطباء اللي يفيدونك مهو حنا وصحيح ما قال الاخ ردودك قاسيه وانت بنفسك لو كلمك احد بنفس اسلوبك راح تزعل فنصيحه كلم الناس بما تحب ان يكلموك

خل عنك اللقافه بس انا ماتعرضت لك و لاجيتك وبعدين انا حر اكتب وارد الي ابي مو انت الي تجي تملي علي وش اقول وش ارد

أسأل الله أن يشفينا وإياك، إذا لم تفيدك الأدوية بالإمكان تغييرها لأدوية أخرى، طبيعي جداً قولي للدكتورة ماناسبتني تغيير الدواء والصبر عليه قد يغير حياتك..
اجتهدي في مرضاة الله وقيام الليل والمحافظة على الفرائض وتربية الأبناء ليكونوا صالحين سجليهم في التحفيظ مثلا .. والجئي إلى ربك بالدعاء
ضعي لك خطة لهذه السنة ونحن على مشارف سنة جديدة، خطة في المجال الديني كيف تقوين علاقتك بالله وإيمانك بطلب علم ولو درسين في الاسبوع مثلا وحفظ القرآن وهكذا ضعي لك أهداف وحققيها ثم انظري لما حققتي ستعطيك دافع للأمام وتفاؤل،،، وخطة في المجال الصحي كيف تحسنين من صحتك. بالمشي مثلا ونظام صحي وفحوصات وصحتك النفسية، وخطة اجتماعية من ناحية التواصل والتعرف على نساء صالحات تجدينهم في دور التحفيظ وحلق العلم ومكاتب الدعوة والمساجد، ومنها تحسين علاقتك بأرحامك وأبنائك قدر المستطاع، وهكذا من جميع الجوانب وهناك أدوات ومواضيع تساعد على وضع الخطة.
ثم اعزمي على التطبيق و انظري للمستقبل بتفاؤل وإيجابية وأنك بإذن الله ستكونين أفضل ..
حاولي يكون لك صديقة تعبرين لها عما في خاطرك ..
أظهري مشاعرك خاصة المشاعر الإيجابية .. وحتى السلبية اذا كانت تؤذيك أظهريها ولا تخجلي من ذلك فقد تجدين الدعم ممن حولك.
ولا أدري هل أنت متزوجة أم لا؟ لأن الزواج قد يحل كثير من مشاكلك بالبوح للزوج خاصة إذا كان زوج عاقل ومتدين ومخلص. وليس عيباً البحث عنه ولكن لاتبحثي عنه بنفسك بل عن طريق صديقاتك الصالحات واسألي الله دوماً (اللهم اهدني وسددني)
أسأل الله أن يوفقك ويسددك

ملاحظة/ وضع الأهداف والخطة يكون بحسب وضعك، وضعي ما تعتقدي أنك تستطيعين إنجازه بإذن الله بالتدريج شيئا فشيئا حتى تستطيعي بإذن الله وضع خطط كبيرة ومهام كبيرة ولكن ابدئي بأمور بسيطة حتى لا تضغطي على نفسك وتملي ..