حابه اساعد من خلال تجربتي البسيطه ..واطمع بدعوه في ظهر الغيب
 

السلام عليكم ورحمة الله وبركاته

انا عضوة جديدة دخلت استفيد وافيد باذن الله

لي سنه مصابه بالهلع .... قبل كم يوم اكتشفت انه هلع عن طريق هالمنتدى اتوقع سبب تاخر علاجي بعد قضاء الله هو عدم معرفتي بالمرض وهالشي سبب لي الخوف
والتفكير اللي يزيدون من حالة الهلع

اتبعت خطوات بتوفيق من الله وكانت سبب بعد الله في التخلص من 70% من اعراض الهلع مثل الدوخه عدم الاتزان الخمول الافكار الغريبه الغثيان الآم عامه في الجسم

تخلصت منها دون معرفتي بالمرض
اول شي الرقيه الشرعيه وسجلت بمنتدى ساعدوني في الخطوات المناسبه من تحصين للبيت والنفس وظهرت علي علامات كثيره
ثانيا سمعت ان الخوف الفجأه يسبب هبوط المعده ومشاكل كثيره هي السبب في زيادة التنمل والخمول الغثيان
ضروري هالعلاج لانه سبب بعد الله في فتح الشهيه بالتالي تتغذى زين ومنها تتقوى لان الجسم يضعف ويدمر بدون غذاء


رحت لمرأه كبيره خبيره في الطب الشعبي وسوت لي كاسات الهوا عن طريق دهن الجسم بزيت ثم وضع شمعه وعليها كاس واحجام الكاسات مختلفه فايدة هالطريقه
رفع البطن وسحب الهواء ...اول جلسه كانت مره متعبه لان جسمي طلع مليان هواء تعذبت وكررت الطريقه ثلاث ايام ورى بعض في البطن والرحم والظهر والاكتاف.. لما ضغطت على البطن قالت انت جاك شي موهين ماشاء الله عليها قالت انت حزنتي على موضوع او احد صدمك وخوفك >> شخصت انها بسبب نفسي وانا اللي ناطه من دكتور للثاني بدون فايده

واعطتني رشاد نصف ملعقه مع ماي على الريق ..طبعا ماشاء الله استفدت كثيييير انفتحت الشهيه وبديت تدريجيا استرد عافيتي بعد الجلسه الثالثه حسيت جسمي تغير وقدرت اتنفس عادي بدون مجهود او كانه شي كابت على الصدر ..مااخفيكم كررت الموضوع بعد شهر والم الكاسات خف كثير



قالت لازم اعشاب تنظف المعده والقولون وكانت عندها خلطة خاصه من مكوناتها اللبان والصبر الحضرمي وغيره اشرب منه فنجان العصر ثلاث ايام
نظفت الجسم وتخلصت من البلاوي اللي تتعب القولون اللي بسببه فيه غازات تزيد الضغط على المعده والقلب فبالتالي يختل التنفس ونتعب زياده >> علما اني مااشتكي من القولون
ثالثا الحجامه ثم الحجامه خاصة اليافوخ والاخدعين وراس المعده تكرر ثلاث شهور ورى بعض لكن قبلها بايام تعتمد رقيه مكثفه
اهم الاغذيه ( ماي زمزم --عسل السمر اقروا عن فوائده -- تمر العجوه --الفواكه والخضار لكن ابتعدوا عن الحمضيات والفلفل واي شي تحسونه يتعب القولون --



جا رمضان وانا لي شهرين مع هالعلاجات وخفيت بنسبة 50 % استعنت بالله وختمت القران مرتين وداومت على الذكر والدعاء طبعا قبل ماكنت اقدر لكن بسبب الخطط اللي اتبعتها قدرت بعد مشيئة الله

تفاجأت برمضان ماشاء الله راح الهلع ! وصرت اطلع بالليل واستانس وماشيل هم السياره واكل اللي ابيه ردت لي الحياة ....لكن

بسبب عدم معرفتي للمرض وانه هلع صار موضوع يخص اهلي وحزنت عليهم وجلست يوم كامل افكر وماجاني نوم ..والصدمه رجعت لي الحاله وانا كنت في مرحلة الوصول للشفاء التام

الحمدلله رضيت بقضاء الله وقدره ...المهم انها عادت لكن ضعيفه واقدر اسيطر عليها ليش لان جسمي ماشاء الله تقوى من ناحية العبادة والذكر ومتابعة الرقيه ثانيا الغذاااااااااء
والآن بعد ماعرفت المرض وقرات اهم العلاجات باذن الله رح اتابع الرقيه المكثفه اللي هي ختم القران في اسبوع ابتعد عن مصادر القلق اغصب نفسي اطنش و اطلع في المساء وان شاء الله اتخلص منها نهائيا


كتب موضوعي يمكن من خلاله افيد الناس اللي يعانون من الدوخه وعدم الاتزان والغثيان والخمول .........

ماشاء الله تبارك الرحمن الله يتمم عليك يارب ويعافيك دوم
لو تساعدني اكون شاكره انا تبهذلت بنوبات الهلع والوسواس بس الحمدلله ع كل حال
وعندي قولون عصبي

علما باني متعرضه صدمات كثير وخذلان وخوف
وياليت تقولين مجمل اعراضك للاستفاده ربي يتمم عليك الشفاء

توفي >> اسال الله ان يشفيك عاجلا غير آجل
علاجي ماكان في يوم وليله احتجت اشهر
اتبعي اللي كتبته فوق
انا نصحت بكاسات الهواء لانها جدا مفيده كلنا نعرف ان الحالة في اول مره تحدث تجينا كمية خوف كبيرة ونحس كان شي نزل المعده وضغط عليها
بالتالي كاسات الهواء او بعض الممرخات يعتمدون المساج للترفيع يرفعون المعده مع ملازمة الراحة والغذاء الجيد بهالفتره

الحجامة خاصة في اليافوخ تحسن من صحتك وتسحب الهواء اللي في الراس واللي بسببه يزيد من النسيان والخوف والتخيلات
الرقيه مهمه جدا انا تعافيت تماما في رمضان تقريبا ثاني اسبوع لاني كنت اقرا قران كثير فجأة لقيت نفسي بعافيه وكانت اجمل ايامي لان مرت علي شهور قبلها صعبه


اعراضي مع الهلع بعد تعرضي لصدمات كثيره وبما اني حساسه
اول مره كنت بمشوار عادي مع اسرتي وفي هاليوم كنت صايمه وفطرت فطور بسيط فجأه احس باختناق وتنفسي صعب وكان روحي بتطلع وضربات القلب قويه
وحرارة في الرحم جلست اتشهد ودخلت الطوارئ التشخيص انتي سليمه ؟؟؟

وتكررت معي الحالة مرتين بنفس الطريقه مشوار في السياره
وبدات الاعراض تزيد تنملات في الجسم ثقل دوخه غثيان كاني بعالم ثاني الآم عامه في الجسم ..سويت حمية ماستفدت طفت الدكاتره باطنيه قلب اذن وحنجره نساء وولاده مخ واعصاب الكل قال سليمه
واخر دكتور قال لااشوفك
قررت ابتدي بالرقيه تعبت كثير في البدايه تابعت مع منتدى عبدالله الخليفه اهم مافي الموضوع الرقيه
التزمت بالحجامه
وكنت اروح للممرخه فايدة كاسات الهواء تسحب الهواء اللي بجسمك ورح تعرفون هالشي لما تجربونه ..ترفع المعده لان هبوطها يسبب غثيان واستفراغ والشهيه تتقفل وايضا تعالج اي فك بالجسم

الغذا وقبلها تناول اللبان والصبر لكن تاخذون الطريقه من خبيره فايدة الصبر تنظيف القولون التئآم الجروح خاصة مع كثرة الاستفراغ
اللبان معروف للذاكره والنسيان
ابتعدت عن الجرجير والخيار والحمضيات والمقالي ...اكلت المشوي لحم دجاج سمك والتلبينه مفيده مره

لاتخافين اختي العلاج سهل لكن يبيله مجهود واصرار وايمان قوي بالله
الله ابتلانا يبينا نرجع له سبحانه يبينا نعيد حساباتنا ونغير حياتنا اللي فيها تقصير
المرض تكفير ومحو للذنوب
نقطه مهمه اقولها لي ولكم

لما شفت العافيه فجأه والله اني ندمت واستحيت من ربي قلت مرت فترة المرض وانا اتذمر منه واشكي ومتضايقه ومالي خلق احد يائسه حزينه !!

ليه ماعرفت اصبر نفسي واحمد الله واقول هذا قضاء وقدر لعله خيره وابتسم واجهاد نفسي على العباده
لاتخلون الاجر يروح عليكم ...عيشوا هاللحظات بذكر الله وحمده وشكره هالمرض والله انه رحمة من ربي لانه يحسسنا بقيمة حياتنا وبقيمة كل لحظه كنا نعيشها

اسال الله لي ولكم الشفاء العاجل

اااممين يارب العالمين
الله يجزاة خير ويجعل ماكتبتيه في موازين حسناتك يارب
فعلا كلامك كله في محله
الله يسعد قليبك بكل خير وراحه بال

جزا ك الله خيرا و تمم علاجك يارب ممكن تعطيني خلطة الاعشاب الي تاخذهم و و جزاك الله على كل حرف تكتبينه

واياك يارب
للاسف هذه خلطات خاصه فيها ماتعلم احد لكن قالت لي عن بعضها لاني اشتكي من الحساسية والله كنت اقطع مسافة من اجلها
هي اعشاب منقعوه في علبة ماي صغيره من مكوناتها لبان الذكر الصبر الحضرمي وحبة البركه ..والباقي ماعرفته
ياخذ منها فنجان قهوه العصر ثلاث ايام ورى بعض وبعدها يوم وترك اسبوع وبعدها يوم ويومين ترك

الافضل تروحون لخبير شعبي يفهم بهالامور وابحثوا عن موضوع شلع السره وهبوط المعده وغيرها هالامراض مايكشفها الطب ...استفدت منها لاني تخلصت من الغثيان وانسداد الشهيه اللي بسببها تزيد الحالة

ماشاء الله