اما بالنسبة لسيروكويل انا لو باخذه بإذن الله تعالى ما راح أخذه فترة طويلة هو عشان فقط يساعد في النوم لين يبدأ يشتغل الفافرين و كذلك يثبت الفافرين و يقلل الأعراض الغير مستحبة للفافرين اللي تزيد في بداية اخذ العلاج خاصة الاسبوع الاول والثاني
لان معروف عن الفافرين و باقي المضادات تزيد اعراض الأمراض معها شراسة خاصة الفترة الأولى من بدء العلاج و السيروكويل و اللي من فصيلته يهبطها
عاد تخيل لو يزيد الهلع و الوسواس و العياذ بالله ايش راح يصير أكثر.. الله لطيف بعباده سبحانه

كذلك الفافرين يطول لين يشتغل مو اقل من اسبوعين و احيان شهر بحسب اللي جربوه و الله المستعان

تعقيبا على موضوع الأطعمة و الاشربة اللي تؤثر في صحتنا النفسية والعقلية لاحظت ان شوربة الشوفان زودت عندي الهلع و الوسواس يا بسبب البهارات المضافة لها ، يا اما الشوفان مصنع غير طبيعي مع اني بالذات الشوربة ما احبها ثقيلة و معمول لها كشنة و زحمة ، اصنعها خفيفة جدا عشان ما تتعب المعدة
اللي لاحظ يخبرنا
وقانا الله وياكم من كل سوء

الغريب ان الادويه تخليك نايمه مع انها مضادات اكتئاب لو تاخذين منوم كان وش صار
انا ايضا الادويه تخليني احس بخمول وفتور لكن عادي اتقهوى واكمل يومي طبيعي
ونصيحه حاولي تروحين لراقي اذا قريب عندكم بعد انتي واهلك دامك شاكه ان الاصابه روحيه مو بعيد تكون كذاا
خاصة ان الحاله زادت برمضان وكثير حالات اسمع تزيد برمضان حتى مستشفى النفسيه كثير حالات تدخله بهالوقت تحديدا مادري ليه
واكاد اجزم اغلب امراضنا اساسها روحي بعدها تطورت للنفسيه
حاولي كثر ماتقدرين اختي تسمعين الرقيه ...
عندك رقية فهد القرني او الخليفه اوو سعود الفايز.. كلهم كويسين وارتاح لما اسمعهم
وروحي لراقي اذا تقدرين مثل ماقلت لك واختمي القرأن دامنا بالشهر الفضيل
وخلك على وضوء بشكل متواصل وادعي كثير
ربي يشفيك ويفرح قلبك ويسعدك

السلام عليكم ورحمة الله وبركاته
حياك الله اخونا نصيبك

بالنسبة للإصابة الروحية تذكرت يوم كنت ثاني ثانوي ما كملت ١٧ عام اصلي التراويح بجانب جدتي في مسجد الحي في منتصف شهر رمضان الا شوي و اطيح من طولي تسلط علي وسواس في الأفكار . أفكار ملحة متلاحقة احاول ادفعها ماني قادرة لين صار قلبي يرجف و شوي ابطير من مكاني و تعبت طحت عليهم لدرجة ودوني و بدأت العلاج النفسي و يجعلني اخر مرة اطب مسجد الحي مع جدتي الله يرحمها مع اني كنت ارافقها يوميا لصلاة التراويح و التهجد منذ الصف السادس

لكني و الحمد لله اجاهد نفسي و ما اترك وردي و اشتغلت على نفسي بعد عون الله و توفيقه الفترة الماضية لكن رجع الوسواس يتسلط علي و الله المستعان و لا حول و لا قوة إلا بالله

اشكرك على تكرمك بالرد

السلام عليكم الله يشفي الوالده انشاءالله وتقوم بالسلامة يا رب بخصوص دواء سيروكويل ممتاز جدا اكثر دواء مضاد ذهان فادني من ناحية النوم والاكتئاب والقلق لكن مشكلته يسبب صعوبة في الاستيقاظ من النوم وخاصه انا موظف هالشي كثير يأثر علي اما دواء فافرين هو دواء اكتئاب لكن الأطباء يكتبون للي عنده وسواس قهرية اغلب شي أفضل دواء لي نوبات الهلع سبراليكس و الرهاب الاجتماعي سيروكسات

السلام عليكم ورحمة الله وبركاته
حياك الله اخونا عمار
ما تشوف شر ربي يجعله اجر و عافية

هذا اللي مخليني اتردد
النوم الطويل المتواصل مشكلة و حالة والدتي الله يعافيها معتمدة علي اعتماد كلي ما تتحرك شبر الا ارافقها لأنها صارت ما تقدر تعتني بنفسها ، كيف اغيب عنها عشرين ساعة متواصلة
لدرجة ناس من اقاربنا انتقلوا لرحمة ربهم ما دريت غير بعد العشر سنين .. نوم متواصل و إذا صحيت مافي تركيز اهم شي اقضي الصلوات الفايتة الله يغفر و اكل لقمة او مهمة سريعة ثم ارجع لكهفي

انا عشر سنوات سقطت من عمري يوم كنت اتعالج بالمضادات ، هذا و انا ما تناولت السيروكويل ، كيف الحين لاني يوميا عشرين ساعة متواصلة مع الاموات
سحبة وحدة حتى ما كنت اقوم اشرب ماء او لأي غرض

العلاج قدامي ماني ساطية اتناوله
و لا بنفس الوقت قادرة اتحمل تسلط الأفكار اللي ماني قادرة ادفعها و ازيحها عن مخي لأجل ارتاح

نفس الأعراض اللي قبل عشرين سنة و فوق ذا زايدة بقوة

فقط ودي اتحكم بعقلي و انام
هذي الحاجتين صايرة عزيزة من يوم الجمعة الماضي

حتى ماني قادرة اركز في صلاتي و الدعاء
اشغل الرقية الشرعية يبدأ و ينتهي القط كم كلمة و الباقي ما اذكره

محرومة من اني ادعي ربي بسبب التركيز صفر لان من لوازم الدعاء حضور القلب و استشعار المفردات، انا حتى صلاتي ما ادري كم ركعة هي ثلاث او اربع بس عزائي ان الله غفور رحيم ما يكلف النفس الا وسعها

عكس بدايات رمضان لدرجة اول مرة بحياتي اختم القرآن و لله الحمد بتركيز عميق في تسع ليالي و كنت مبسوطة
اول مرة بحياتي اختمه قبل ينتهي الشهر و كنت وقتها ناوية اختمه ثلاث مرات و راح تكون أول مرة بحياتي اصل لهذا الحماس و العدد

انا الان في بداية الختمة الثانية كله بسبب ضعف التركيز
قلبي و عقلي ما طاوعوني
أفكار متسلطة متلاحقة و قلب يرجف من الخوف

ما قصرت على التكرم بالرد و الإفادة

تذكرت قوله تعالى يوم يتحدث عن حالة ام نبينا موسى عليه السلام يوم القته في اليم : " و أصبح فؤاد ام موسى فارغا...."

اي فارغ من كل شي الا من التفكير بولدها حتى كادت تبين للاعداء و تبحث عنه و ينكشف أمرها و امر ولدها... يعني من تسلط التفكير فيه ودها تصرخ و تعلم الناس و ينكشف كل شي و ممكن يقتلون ولدها لولا ربي سبحانه ربط على قلبها و بالاخير رده لها سبحانه

انا ودي اركز بالدعاء و ربي يربط على قلبي و انفك من عقال الوساوس و ارتاح و ما ذلك على الله بعزيز

استغفر الله العظيم اتوقع لو ام فاقدة ولدها تبي تدعي ربها بتركيز و خشوع و دموع بينما انا محرومة من هذا
فقط اصلي على الرسول صلى الله عليه وسلم طوال الوقت لان الصلاة عليه دعاء و ربي يدري عن مطلبي سبحانه
قريب مجيب أكبر من الوساوس و القلق و الفزع و الهلع و الهموم قادر عليها سبحانه بل على كل شي قدير

من شوي كلمت المجمع الطبي اللي صرف لي الطبيب امس العلاج.. فقط طلبت يكتب لي علاج مؤقت أخذه عند اشتداد الحالة لو كم ساعة اركز فيها في شؤوني و اغمض جفوني كم ساعة لكن ما ردوا

يعني دوا لفترة مؤقتة و لايام قليلة و ما يحتاج اقطعه بالتدريج بدال دوامة المضادات النفسية و توابعها اللي زي المنايا اذا انشبت اظفارها ما تفك الجسد الا بزوال الروح
احيان الموت راحة مير البلا من ذاق طعمه و لا مات
و الحمد لله على كل حال

السلام عليكم ..
أول شئ أختي الله يكتب أجرك اللي تسوينه مع أهلك مو شئ سهل .. فعلا أنتي رحمه من الله لهم .
ماني هنا عشان أساعدك في الأدوية لأني ما أعرف عنها كثير .
بس حبيت أذكر لك أن القهوة تقلل من إمتصاص الدواء فالجسم .. والمشي يزيد إمتصاصه .. فحاولي تقللين الأولى وتكثرين من الثانية .
وحسب كلام أحد الأطباء الناس أكثر شئ تتعب في رمضان . وهذا طبيعي .
أنا كان بداية تعبي مع رمضان .
لكن أحب أقولك لو تكلمين المستشفى يعطيك دواء أخف من ناحية النوم ..
وأنصحك تلزمين الدواء عشان ترتاحين . 👍
وحاولي تخففين ضغوط أدري صعب .. قد ما تقدرين .
ساعدي نفسك أولا عشان تقدرين تساعدين أهلك .
وأسأل الله أن يطمن بالك على الوالدة .
ما يمنع لو طلبتي المساعدة من أقاربك .
والله يقويك ويكون بعونك وييسر أمرك .
لك منا كل الدعاء .🩷

السلام عليكم ورحمة الله وبركاته

هلا بك اختي بخير ربي يجعلك دوم بخير و في خير

اشكرك على بلسم حروفك و دعواتك

ربي يرحمنا وياك برحمته في الدارين

يكفي دعمك المعنوي و دعواتك

بالنسبة للقهوة خلاص تبت

اصلا انا من يوم الجمعة ماني حول شي ماغير من الرعب و الخوف اتجمد في مساحة معينة قليل اتحرك منها مضطرة و فوقها جسمي كله يرجف مع رجف قلبي

يعني ساكن و متحرك بنفس الوقت مدري كيف و الله المستعان

بعد صلاة الفجر سمعت رقية سعود الفايز اللي ذكرها احد الاخوان الله يجزيه خير و من يوم طاحت جفوني بين النوم و اليقظة شفت واحد منظره بشع
وجه فقط ملامحه تجمع بين الإنسان و الشيطان يتفل علي و هو متضايق و صوت اغاني صاخب و ناس اعرفهم و ناس ما اعرفهم و مطاردات و الله المستعان ثم كل ما اجي اقرا اية الكرسي و الرقية شغالة اغيب ثم ارجع اعيدها و اغيب ما اقدر أكملها و غيبت لمدة ساعة الا ربع و انا ما كملت الآية

هل ينفع يرقي المسلم نفسه بدون تدبر للايات لانه عقله مشغول بالوساوس و الخوف .. إذا القلق عدو التركيز كيف لاجتمعت الوساوس و القلق و الله المستعان

اظن في مثل هذي الحالة حالك انعدام التركيز يجوز المريض يستعين براقي لكن المشكلة كل الرقاة اللي عطوني ارقامهم يحددون مبالغ فلكية قبل جلسة الرقية
اعتراضي على التحديد احسه ما راح يرقي من قلبه طالما دخلت الدنيا في عمله و طالما دخلت الدنيا في قلبه حتى المرقي عليه ما راح يستفيد من الرقية
الواحد من نفسه من باب الذوق يعطيهم مو هم يتشرطون
حتى سبق شفت بعض منهم ما ارتحت احسهم طلاب دنيا الله يهدي الجميع

الراقي الشرعي غير انه يرقي على ضوء الكتاب و السنة لابد يكون محتسب زاهد يبتغي ما عند الله اولا
لان عمله ما هو بسيط عند الله و عند الناس
عمله اهم حتى من الطبيب لان الاطباء كثر و الاختصاصات متنوعة
لكن الراقي المحتسب الزاهد العفيف صاحب الضمير الحي نادر و الله المستعان و فوق ذي قاعد ينقذ أرواح معطلة بقدرة ربه

فيه موضوع طبيت فيه عن الفافرين حسيته شوي اقنعني

لحظة اجيب الرابط

https://www.mosoah.com/health/medici...-improve-mood/

كاتبين ممكن الواحد يستمر على جرعة ٥٠ ملجم
و الطبيب يبغاني أطب على جرعة ٥٠ ملجم كجرعة مبدئية اللي حدها إلى ٣٠٠ ملجم

الفافرين زي غيره من المضادات اذا اخذ بجرعة كبيرة زي ذي الجرعة تبي تزيد الحالة سوء في البداية خاصة الاسبوع الاول ، يعني تزيد حدة الهلع و الوسواس
انا الان ماني قادرة اتحمل

هل ينفع ابدا بربع حبة بدال نصف
يعني بجرعة ٢٥ ملجم

انا الان ماني قادرة اتحمل طحن الأفكار براسي و الصداع و قلة النوم و الهلع كيف لو تبي تزيد حدة هذي الأعراض في البداية
اكلم المجمع ماهم راضيين يوصلوني بالطبيب
بواسطة واتس المجمع على الاقل
يبون الواحد يروح لهم و انا من شدة انعدام التركيز اللي سببه الخوف بعد ما زاد مع مرور الايام ماني قادرة اتحرك من مكاني و الله المستعان

من شوي و انا استمع الرقية بدون تركيز رغم عني
في مقدمة المقطع ذاكر الراقي ان زي ما ينفثون الشياطين بالعقد لازم يهتم المريض بمسالة النفث على نفسه ماهو فقط يستمع
يقول لابد يحاربهم من جنس فعلهم اللي هو النفث

وقتها طرى على بالي الكابوس اللي شفته يوم كنت استمع الرقية بعد صلاة الفجر انا علمتكم ان فيه واحد ملامحه شيطان على انسان قاعد يتفل علي
اثاريه ينفث ما يتفل لانه بدا يتضايق من سماعي للرقية غير الاغاني الصاخبة اللي كنت اسمعها عشان يغطون على صوت الرقية
حسبنا الله ونعم الوكيل في كل مؤذ